اسلام آباد۔9جولائی (اے پی پی):وزیراعظم محمد شہباز شریف کی قیادت میں ملکی ترقی کے سفر پر اعتماد کا اظہار کرتے ہوئے خیبر پختونخوا سے معروف سیاسی شخصیت ثمر ہارون بلور نے مسلم لیگ ن میں شمولیت اختیار کرلی۔
وزیراعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف سے ثمر ہارون بلور، سعیدہ جمشید اور جمشید مہمند نے بدھ کو یہاں ملاقات کی۔ مشیر وزیر اعظم رانا ثناء اللہ، وفاقی وزیر امور گلگت بلتستان و کشمیر اور صوبائی صدر مسلم لیگ ن خیبر پختونخوا انجینئر امیر مقام، وفاقی وزیر مذہبی امور سردار یوسف، وزیر برائے پبلک افیئرز یونٹ رانا مبشر اور مسلم لیگ ن کے صوبائی جنرل سیکریٹری مرتضی جاوید عباسی بھی ملاقات میں موجود تھے۔
ثمر ہارون بلور نے ملکی معاشی استحکام، عوام دوست بجٹ اور ملکی معاشی ترقی کی درست سمت پر وزیر اعظم کی قیادت کو خراج تحسین پیش کرتے ہوئے کہا کہ ان کی خواہش ہے کہ وفاق اور پنجاب کی طرز پر خیبرپختونخوا بھی ترقی کی راہ پر گامزن ہو۔
ثمر ہارون بلور نے وزیر اعظم اور پارٹی قیادت کے ساتھ مل کر خیبر پختونخوا کے عوام کی خدمت کے عزم کا اظہار کیا ۔ وزیر اعظم نے ثمر ہارون کا پارٹی میں خیر مقدم کرتے ہوئے ان کے مستقبل کیلئے نیک خواہشات کا اظہار کیا۔ وزیر اعظم نے ثمر ہارون بلور کے عوامی خدمت کے جذبے کو سراہا اور بلور خاندان کی قربانیوں اور خدمات کا اعتراف کیا۔
