لاہور ۔31مارچ (اے پی پی):وزیراعظم محمد شہبازشریف نے عید کے موقع پر بنگلہ دیش کے چیف ایڈوائزر پروفیسر ڈاکٹر محمد یونس سے ٹیلی فون پر گفتگو کی اور عید الفطر کی مبارکباد پیش کی۔پرائم منسٹر آفس میڈیا ونگ کی جانب سے پیر کو جاری اعلامیہ کے مطابق وزیر اعظم محمد شہباز شریف نے گزشتہ سال اقوام متحدہ جنرل اسمبلی (یو این جی اے) اور D-8 سربراہی اجلاس کے دوران نیویارک اور قاہرہ میں اپنی گرمجوش اور نتیجہ خیز ملاقاتوں کا ذکر کرتے ہوئے دونوں ممالک کے درمیان دو طرفہ تعلقات بالخصوص تجارت اور سیاحت میں مثبت رفتار پر اپنے اطمینان کا اظہار کیا۔
دونوں رہنماؤں نے پاکستان اور بنگلہ دیش کے درمیان دوطرفہ تعلقات کو مزید مضبوط بنانے کی اپنی مشترکہ خواہش کا اعادہ کیا۔اس حوالے سے وزیراعظم نے اپریل میں نائب وزیراعظم/وزیر خارجہ پاکستان کے دورہ ڈھاکہ کے حوالے سے اس امید کا اظہار کیا کہ ایک تجارتی وفد بھی ان کے ہمراہ بنگلہ دیش جائے گا۔ انہوں نے تمام سطحوں پر دوطرفہ تعلقات کی بحالی کے لیے ادارہ جاتی نظام کو بحال کرنے کی ضرورت پر بھی زور دیا۔ دونوں ممالک کے مابین عوامی رابطوں کو فروغ دینے کے لیے ثقافتی وفود کے تبادلے پر بھی تبادلہ خیال کیا گیا۔
وزیراعظم نے بنگلہ دیش سے ایک ثقافتی وفد کو پاکستان کے دورے پر بھیجنے کی تجویز دی جس میں پرانے اور نئے فنکار بالخصوص لیجنڈ اداکارہ رونا لیلیٰ بھی شامل ہوں۔وزیراعظم محمد شہباز شریف نے بنگلہ دیش کے چیف ایڈوائزر کو پاکستان کا دورہ کرنے کی اپنی دعوت کا اعادہ بھی کیا۔
Short Link: https://urdu.app.com.pk/urdu/?p=577565
