اسلام آباد۔31مارچ (اے پی پی):وزیر اعظم محمد شہباز شریف نے میانمار میں تباہ کن زلز لہ پر گہرے دکھ اور افسوس کا اظہار کیا ہے ،میانمار کی اعلیٰ قیادت سینئر جنرل من آنگ ہلینگ، چیئرمین سٹیٹ ایڈمنسٹریشن کونسل و وزیر اعظم میانمار سے ٹیلیفونک گفتگو کرتے ہوئے انہوں نے میانمار میں 28 مارچ 2025 کو آنے والے تباہ کن زلز لہ کے نتیجے میں قیمتی جانوں اور املاک کے نقصان پر پاکستانی عوام اور حکومت پاکستان کی جانب سے گہرے دکھ اور افسوس کا اظہار کیا۔
پرائم منسٹر آفس میڈیا ونگ کی جانب سے جاری اعلامیہ کے مطابق عید الفطر کے موقع پر پیر کو ٹیلی فون پر گفتگو کرتے ہوئے وزیر اعظم محمد شہباز شریف نے میانمار کے وزیر اعظم کو یقین دلایا کہ پاکستان زلز لہ سے متاثرہ افراد کی تکالیف کو کم کرنے کے لیے ہر قسم کی مدد فراہم کرنے کے لیے تیار ہے۔ انہوں نے میانمار کے وزیراعظم کو بتایا کہ ان کی ہدایت پر نیشنل ڈیزاسٹر منیجمنٹ اتھارٹی تقریباً 70 ٹن امدادی سامان میانمار کے لیے روانہ کرے گی اور دو کھیپ پر مشتمل امدادی سامان آئندہ 48 گھنٹوں میں زلزلہ سے متاثرہ لوگوں کی مدد کے لیے پہنچ جائے گا۔
وزیراعظم نے میانمار کے عوام کی بہادری اور استقامت پر اعتماد کا اظہار کیا اور امید ظاہر کی کہ وہ جلد اس قدرتی آفت پر قابو پالیں گے۔میانمار کے وزیر اعظم نے وزیر اعظم محمد شہباز شریف اور پاکستانی عوام کے حسن سلوک کو سراہا اور مشکل کی اس گھڑی میں میانمار کے عوام کے ساتھ کھڑے ہونے پر ان سے اظہار تشکت بھی ادا کیا۔
Short Link: https://urdu.app.com.pk/urdu/?p=577611
