وزیر اعظم کا پائیدار ترقی کے لئے جوہری ٹیکنالوجی سے فائدہ اٹھانے کے عزم کا اعادہ، پاکستان نے جوہری توانائی کی پیداوار، صنعتی ترقی، علاج معالجہ ، زرعی، سماجی و اقتصادی ترقی میں نمایاں پیشرفت کی ہے، شہباز شریف

اسلام آباد۔12فروری (اے پی پی):وزیراعظم محمد شہباز شریف نے پائیدار ترقی کے لئے جوہری ٹیکنالوجی سے فائدہ اٹھانے کے عزم کا اعادہ کرتے ہوئے کہا ہے کہ پاکستان نے جوہری توانائی کی پیداوار، صنعتی ترقی، علاج معالجہ ، زرعی، سماجی و اقتصادی ترقی میں نمایاں پیشرفت کی ہے۔

پی ایم آفس کے میڈیا ونگ سے جاری بیان کے مطابق ان خیالات کا اظہار انہوں نے یہاں انٹرنیشنل اٹامک انرجی ایجنسی (آئی اے ای اے )کے ڈائریکٹر جنرل رافیل گروسی سے گفتگو کرتے ہوئے کیا جنہوں نے بدھ کو یہاں ان سے ملاقات کی۔ وزیر اعظم نے موسمیاتی تبدیلیوں کو کم کرنے کے لئے جوہری توانائی کو فروغ دینے کے لئے آئی اے ای اے کے اقدامات کو سراہا۔

انہوں نے پائیدار ترقی کے لئے جوہری ٹیکنالوجی سے فائدہ اٹھانے کے لئے پاکستان کے عزم کا اعادہ کیا۔ملاقات کے دوران کینسر کی تشخیص و علاج، زراعت، غذائی تحفظ، پانی کے انتظام اور صنعت سمیت مختلف شعبوں میں جوہری ٹیکنالوجی کے پرامن استعمال پر تبادلہ خیال کیا گیا۔

وزیراعظم نے کہا کہ پاکستان نے بطور رکن آئی اے ای اے تنظیم کے ساتھ نتیجہ خیز اور باہمی طور پر فائدہ مند شراکت داری کو برقرار رکھا ہے، آئی اے ای اے کے تعاون سے پاکستان نے جوہری توانائی کی پیداوار، صنعتی ترقی، صحت کی دیکھ بھال، زرعی، سماجی اور اقتصادی ترقی میں نمایاں پیشرفت کی ہے۔

انہوں نے پرامن مقاصد کے لئے جوہری ٹیکنالوجی کی مکمل صلاحیت کو بروئے کار لانے کے لئے آئی اے ای اے کے ساتھ تعاون کو مزید مضبوط بنانے کے لئے پاکستان کے عزم کا اعادہ کیا۔ڈائریکٹر جنرل آئی اے ای اے نے پاکستان کے دیرینہ تعاون کو سراہا اور کہا کہ آئی اے ای اے پاکستان کے ساتھ اسی جذبے سے کام کرتا رہے گا

Short Link: https://urdu.app.com.pk/urdu/?p=559715