لاہور۔26اپریل (اے پی پی):وفاقی وزیر غذائی تحفظ رانا تنویر حسین نے کہا ہے کہ وزیر اعظم محمد شہباز شریف کی انتھک محنت سے ملک ترقی کی جانب گامزن ہو چکا ،ملکی برآمدات کے فروغ کیلئے تمام وسائل بروئے کار اورلائیو سٹاک سیکٹر میں مزید اصلاحات لائی جا رہی ہیں ، ایگریکلچرل کے شعبے میں تحقیق پر خصوصی توجہ مرکوز ہے ۔ان خیالات کا اظہار انہوں نے ہفتہ کو یہاں مقامی فوڈ کمپنی کے دورے کے موقع پرمیڈیا گفتگوکرتے ہوئے کیا۔وفاقی وزیر نے کہا کہ وزیر اعظم محمد شہباز شریف کی مدبرانہ سوچ اور ان کی باصلاحیت ٹیم کی بدولت ملکی معیشت بحال اور اس میں استحکام آیا ہے ،ملکی برآمدات میں اضافہ اور درآمدات میں کمی آئی ہے ،حکومت زراعت و لائیو اسٹاک کے شعبے کی ترقی کے لیے بھرپور اقدامات کر رہی ہے۔
رانا تنویر حسین نے کہا کہ زراعت کے شعبے میں جدید ٹیکنالوجی کے استعمال کو فروغ دیا جا رہا ہے تاکہ پیداوار میں اضافہ ہو، زرعی اور لائیو سٹاک کے شعبوں میں تحقیق پر بھی خصوصی توجہ دی جا رہی ہے۔وفاقی وزیر نے کہا کہ گزشتہ سال کی نسبت کھاد کی قیمتوں میں کمی آئی اور اس کی دستیابی کو بھی یقینی بنایا گیا ہے، حکومت کسانوں کو آسان شرائط پر قرضے فراہم کرنے کے لیے بھی موثر اقدامات کر رہی ہے۔
رانا تنویر حسین نے کہا کہ حکومت کی کوشش ہے کہ ملک پیک پر ٹیکسز ختم ہو جائیںتاکہ عوام کو سستا دودھ ملے ،دودھ اور گوشت کی سستی و معیاری فراہمی کیلئے حکومت لائیو سٹاک سیکٹر کو سہولتیں فراہم کررہی ہے۔ انہوں نے کہا کہ حکومت کے تعاون سے اونٹ کے دودھ کو اکٹھا کرکے ای ایل سی کمپنی اسے پائوڈر کی شکل میں ڈال کرچائنہ کیلئے ایکسپورٹ کرنے جارہی ہے، ای ایل سی کی ٹیم نے مقامی کمپنی سے مل کر عالمی معیار کے مطابق بنایا گیاتقریبا 20ًٹن خشک دودھ جلد چائنہ کو ایکسپورٹ کریں گے، یہ بہت اچھا اقدام اور مقامی فوڈ کمپنی کی جانب سے چین کو خشک دودھ کی برآمد سے ملک کو قیمتی زرمبادلہ حاصل ہوگا۔
وفاقی وزیر نے کہا کہ وزیر اعظم ایگریکلچر کے حوالے سے بہت پرعزم ہیں ، نجی کمپنی حکومت کے ساتھ اشتراک سے کاروبار کرسکتی ہے جس کے لئے تمام ممکنہ سہولیات حکومت فراہم کر ے گی ۔ انہوں نے کہا کہ اگر مویشیوں کی بر آمدات سے پاکستان میںجانوروں کی کمی ہونے کا خدشہ پیدا ہو تا ہے تواسے بند کردیں گے، حکومت لائیوسٹاک میںبھینسوں کے حوالے سے ایک سکیم لار ہی ہے جس میں فارمرز کو بھینسوں کے فارمز بنا نے کیلئے حکومت بھر پور تعاون کرے گی ۔
کاٹن انڈسٹری کے حوالے سے انہوں نے کہاکہ پہلے ہماری ایک کروڑ50لاکھ بیلز تھیں جو گذشتہ سال صرف 45ہزار پر آگئیں جبکہ حکومت کی مثبت پالیسیوں کی بدولت رواں سال ہم ایک کروڑ سے تجاوز کرجائیں گے جو کہ خوش آئند اقدام ہے ۔ انہوں نے کہا کہ ملک پیک انڈسٹری کے فروغ کیلئے چھوٹے کاشتکاروں کو آسان طریقوں کے ذریعے بینک سے قرضوں کی فراہمی کی جارہی ہے تاکہ وہ اپنی فارمنگ بہتر طریقے سے کرسکیں ۔ کھادوں کی قیمتوں کے حوالے سے انہوں نے کہاکہ ہم دیکھ رہے ہیں کہ ان کی قیمتیں نہ بڑھیں، تاہم وافر سٹاک ہونے کی صورت میں حکومت کھاد بھی ایکسپورٹ کرے گی۔
Short Link: https://urdu.app.com.pk/urdu/?p=588258
