پشاور۔ 03 اگست (اے پی پی):وزیر اعلیٰ خیبر پختونخوا علی امین خان گنڈاپور نے رشکئی اسپیشل اکنامک زون کا دورہ کیا۔ وزیر اعلیٰ سے پاکستان کے دورے پر آئے ہوئے مختلف شعبوں کے چینی ماہرین کے وفد نے ملاقات کی۔
وزیر اعلیٰ کے معاون خصوصی برائے صنعت، چیف سیکرٹری، ایڈیشنل چیف سیکرٹری پی اینڈ ڈی، محکمہ صنعت، اور وفاقی بورڈ آف انوسٹمنٹ اینڈ ٹریڈ کے حکام بھی ملاقات میں موجود تھے۔ ملاقات میں باہمی دلچسپی کے مختلف امور پر تبادلہ خیال کیاگیا۔
خیبر پختونخوا میں مختلف شعبوں میں چینی سرمایہ کاری اور باہمی اشتراک کو فروغ دینے سے متعلق معاملات پر گفتگو کی۔ وزیر اعلیٰ خیبر پختونخوا نے کہاکہ چینی ماہرین کے وفد کو خیبر پختونخوا میں خوش آمدید کہتے ہیں اور صوبائی حکومت مختلف شعبوں میں بیرونی سرمایہ کو فروغ دینے کا ارادہ رکھتی ہے۔ انہوں نے کہا کہ خیبر پختونخوا میں زراعت، صنعت، سیاحت اور پن بجلی سمیت دیگر شعبوں میں بیرونی سرمایہ کاری کے بے پناہ مواقع موجود ہیں اور صوبائی حکومت خود بھی ان شعبوں میں خطیر سرمایہ کاری کر رہی ہے۔
انہوں نے کہا کہ صوبے میں لوگوں کے لئے روزگار کے مواقع پیدا کرنا اور صوبے کی آمدن کو بڑھانا صوبائی حکومت کی اہم ترجیحات میں شامل ہے، اس مقصد کے لئے استعداد کے حامل شعبوں کو فروغ دینے پر ایک مربوط لائحہ عمل کے تحت اقدامات کئے جارہے ہیں، صوبائی حکومت استعداد کے حامل ان شعبوں میں چینی سرمایہ کاری کا بھی خیر مقدم کرے گی، صوبائی حکومت نہ صرف غیر ملکی سرمایہ کاری کی حوصلہ افزائی کرے گی بلکہ سرمایہ کاروں کو ہر ممکن سہولیات بھی فراہم کرے گی، صوبے میں سرمایہ کاروں کو سہولیات کی فراہمی کے لئے ایز آف ڈوئنگ بزنس پالیسی کے تحت ٹھوس اقدامات اٹھائے جارہے ہیں،
انہوں نے کہاکہ صنعتی شعبے کے فروغ کے لئے مقامی صنعتوں کو سستے نرخوں پر بجلی کی فراہمی کے لئے اقدامات کئے جا رہے ہیں، وزیر اعلیٰ علی امین گنڈاپور نے کہاکہ اس سلسلے میں صوبائی حکومت کی بجلی کی پیداوار کو بڑھانے پر کام ہورہا ہے اور مقامی صنعتوں کو سستی بجلی کی فراہمی کے لئے صوبائی حکومت کی اپنی گرڈ اینڈ ٹرانسمیشن کمپنی کا قیام عمل میں لایا گیا ہے، انہوں نے کہاکہ صوبائی حکومت اپنی ٹرانسمیشن لائن بچھانے کے لئے غیر ملکی سرمایہ کاری کی بھر پور حوصلہ افزائی کرے گی، انہوں نے کہاکہ چینی ماہرین کے وفد کا دورہ صوبے میں چینی سرمایہ کاری کو فروغ دینے میں مددگار ثابت ہوگا، اور مستقبل میں بھی اس طرح کے وفود کے تبادلے ہونے چاہئیں،
انہوں نے کہاکہ صوبے میں کام کرنے والے غیر ملکی سرمایہ کاروں کی سکیورٹی کو ہر لحاظ سے یقینی بنایا جائے گا، چینی وفد نے کہاکہ خیبر پختونخوا میں زراعت، آبی وسائل اور صنعتی شعبوں میں باہمی اشتراک کار اور سرمایہ کاری کے بہت ذیادہ مواقع موجود ہیں، چینی ماہرین نے مزید کہاکہ صوبے میں سرمایہ کاری کے مواقع کو ایکسپلور کرنے کے لئے مزید وفود صوبے کا دورہ کریں گے، وزیر اعلی نے رشکئی اسپیشل اکنامک زون میں قائم صنعتی یونٹوں کا بھی دورہ کیا اور متعلقہ حکام نے ان صنعتی یونٹوں سے متعلق وزیر اعلی کو بریفنگ دی۔
Short Link: https://urdu.app.com.pk/urdu/?p=490384
