کراچی۔ 27 اگست (اے پی پی):وزیر اعلی سندھ سید مراد علی شاہ کی زیر صدارت وزیر اعلی ہائوس میں اجلاس منعقد ہوا۔ اجلاس میں عید میلاد النبیؐ (12 ربیع الاول) کے موقع پر سکیورٹی، صفائی ستھرائی اور بجلی کی فراہمی کے انتظامات کو حتمی شکل دی گئی۔بدھ کو وزیر اعلی ہائوس سے جاری اعلامیہ کے مطابق اجلاس کے آغاز پر وزیر اعلی سندھ نے شرکا ء کو ماہ ربیع الاول کی آمد پر مبارکباد دیتے ہوئے کہا کہ حضرت محمد مصطفیؐ کی 1500ویں ولادت باسعادت عقیدت و احترام کے ساتھ منائی جائے گی۔ انہوں نے کہا کہ حضورؐ کی ولادت تمام انسانیت کے لیے رحمت اور شفقت کا پیغام ہے۔انہوں نے انسپکٹر جنرل پولیس کو ہدایت کی کہ سندھ بھر میں ربیع الاول کے تمام پروگراموں اور جلوسوں کے لیے فول پروف سکیورٹی انتظامات یقینی بنائے جائیں۔وزیر اعلی سندھ نے ڈویژنل کمشنرز کو ہدایت دی کہ تمام اضلاع میں صفائی ستھرائی کے مکمل انتظامات یقینی بنائے جائیں اور جہاں ضرورت ہو وہاں سڑکوں اور نکاسی آب کے نظام کی فوری مرمت کی جائے۔
انہوں نے کے الیکٹرک، حیسکو اور سیپکو پر زور دیا کہ وہ ڈویژن اور ضلعی انتظامیہ کے ساتھ مکمل رابطے میں رہتے ہوئے جشن کے دوران بلا تعطل بجلی فراہم کریں۔اس موقع پر علمائے کرام نے عید میلاد النبیؐ کو مذہبی جوش و خروش اور پرامن ماحول میں منانے کے لیے مختلف تجاویز پیش کیں۔ وزیر اعلی سندھ نے یقین دلایا کہ سکیورٹی، صفائی ستھرائی اور انتظامی رابطے سے متعلق ان کی تجاویز پر عمل درآمد کیا جائے گا۔ انہوں نے انتظامیہ کو ہدایت دی کہ وہ علمائے کرام کے ساتھ مسلسل رابطے میں رہ کر انتظامات کو سہل بنائے۔وزیر اعلی سندھ نے زور دیا کہ عید میلاد النبی ۖ شایانِ شان طریقے سے منائی جائے گی جو اتحاد، عقیدت اور احترام کی عکاسی کرے گی۔اجلاس میںصوبائی وزرا ء شرجیل انعام میمن، سید ناصر حسین شاہ، سعید غنی، ضیا الحسن لنجار، ریاض شاہ شیرازی، سینیٹر وقار مہدی ، میئر کراچی بیرسٹر مرتضی وہاب،چیف سیکریٹری آصف حیدر شاہ، انسپکٹر جنرل پولیس غلام نبی میمن، سیکریٹری داخلہ اقبال میمن، کمشنر کراچی حسن نقوی، کراچی واٹر اینڈ سیوریج کارپوریشن اورکے الیکٹرک کے نمائندے بھی شریک تھے جبکہ اس موقع پر حاجی حنیف طیب، مفتی نذیر جان، ڈاکٹر صاحبزادہ فرید الدین قادری، ثروت اعجاز قادری، مولانا محمد اکبر درس، مولانا قاضی احمد نورانی، علامہ ڈاکٹر جمیل راٹھوڑ، مفتی محمد قاسم، علامہ اشرف گورمانی سمیت بڑی تعداد میں علمائے کرام بھی موجود تھے۔
