لاہور۔11مئی (اے پی پی):وزیر اعلی پنجاب نے عظیم کامیابی پر وزیر اعظم محمد شہباز شریف کے یومِ تشکر منانے کے فیصلے کا خیر مقدم کیا ہے ،اللہ تعالی کے شکر گزار ہیں کہ دشمن کے ناپاک ارادوں کو خاک میں ملایا۔اتوار کے روز جاری اپنے ایک بیان میں انہوں نے کہا کہ آج کا دن صرف شکرگزاری کا نہیں بلکہ غیرت، جرات، اور قومی وحدت کی فتح کا دن ہے ،عظیم کامیابی پر وزیر اعظم محمد شہباز شریف کے یومِ تشکر منانے کے فیصلے کا خیر مقدم کرتے ہیں۔
مریم نواز نے کہا کہ پاک فوج بہادر، پروفیشنل اور باصلاحیت ادارہ ہے ،افواج پاکستان نے بھارتی جارحیت کا جواب صرف گولی سے نہیں بلکہ حکمت سے دیا ، اللہ تعالی کے شکر گزار ہیں کہ پاک فوج نے دشمن کے ناپاک ارادوں کو خاک میں ملایا اور شاہینوں نے دشمن کے طیارے گر ا کر دنیا کو پیغام دیا پاکستان کا دفاع ناقابلِ تسخیر ہے۔
انہوں نے کہا کہ دنیا نے جان لیا پاکستان اپنے دفاع میں ایک قدم پیچھے نہیں ہٹے گا،ان جوانوں کو سلیوٹ جنہوں نے دشمن کی آنکھوں میں آنکھیں ڈال کر بتایا پاکستان پر امن ہے کمزور یا بزدل نہیں۔
انہوں نے کہا کہ نوجوانوں کو تعلیم، ہنر، ٹیکنالوجی سے امپاور کریں گے، ایسا پاکستان بنائیں گے جسے کوئی دشمن میلی آنکھ سے دیکھنے کا تصور نہ کر پائے گا کیونکہ پاکستان کی قیادت مخلص ، قوم متحد اور افواج ناقابل شکست ہیں،شہدا کی قربانیوں کو رائیگاں نہیں جانے دیں گے۔
Short Link: https://urdu.app.com.pk/urdu/?p=595607
