لاہور۔7مارچ (اے پی پی):وزیر اعلی مریم نواز کی زیر صدارت لاہور ڈویلپمنٹ پروگرام کے حوالے سے خصوصی اجلاس منعقد ہوا جس میں لاہور ڈویلپمنٹ پراجیکٹ پر پیشرفت کا جائزہ لیا گیا۔ اجلاس میں ڈپٹی کمشنر نے لاہور ڈویلپمنٹ پلان پر رپورٹ پیش کی۔
وزیر اعلی نے کنال کی بھل صفائی کرانے کا حکم دیا اور مستقبل کی ضروریات کو مد نظر رکھ کر سیوریج سسٹم بنانے کی ہدایت کی۔ وزیراعلی مریم نواز کو بریفنگ میں بتایا گیا کہ واسا لاہور میں مجموعی طور پر 780کلومیٹر ایک سے چھ فٹ قطرنئے پائپ بچھائے گا، پہلے مرحلے میں لاہور میں 450 کلومیٹر طویل سیوریج پائپ بچھائے جائیں گے، لاہور ڈویلپمنٹ مینجمنٹ انفارمیشن سسٹم کے ذریعے کنٹریکٹ کا آغازکیا جارہا ہے، نیسپاک انسپکٹر ایپ کے ذریعے پراجیکٹ کی انسپکشن کر سکے گا۔
بریفنگ میں مزید بتایا کہ لاہور ڈویلپمنٹ مینجمنٹ انفارمیشن سسٹم کے ذریعے ڈیجیٹل ٹریکنگ اور فزیکل و فنانشل پراگریس بھی چیک کی جا سکے گی۔ لاہور ڈویلپمنٹ پلان میں شفافیت سے 16ارب روپے کی بچت کی گئی۔پہلے فیز میں لاہو رکے چھ زون کی تعمیرومرمت اور ڈویلپمنٹ کی جائے گی، ڈویلپمنٹ پلان میں فراہمی و نکاسی آب کا نظام،رابطہ سڑکوں اورپختہ گلیوں کی تعمیر شامل ہے، سٹریٹ لائٹ کی تنصیب اور پارکس کی بحالی بھی ڈویلپمنٹ پلان میں شامل ہے۔ وزیراعلی نے کہا کہ دیہات میں بھی گلیاں شہروں کی طرح بہترین بنائی جائیں،ترقیاتی منصوبوں کے معیار پر کوئی سمجھوتا نہیں ہوگا۔
Short Link: https://urdu.app.com.pk/urdu/?p=569957
