لاہور۔8مئی (اے پی پی):وزیر اعلی پنجاب مریم نواز شریف نے لاہور سمیت ملک کے دیگر مقامات پر بھارتی ڈرون حملوں کی شدید الفاظ میں مذمت کی ہے۔انہوں نے12 مقامات پر بھارتی ڈرون بر وقت گرانے پر پاک فوج کو خراج تحسین اور انتظامیہ، پولیس، ریسکیو سروسز اور پاک فضائیہ کے بروقت رسپانس کو سراہا۔
وزیراعلی مریم نواز نے ہدایت دیتے ہوئے کہا کہ پنجاب کے مختلف شہروں میں ڈرون حملوں کے دوران زخمی شہری اور افسران کے بہترین علاج میں کوئی کسر اٹھا نہ رکھی جائے اور متعلقہ علاقوں میں انتظامی افسران کو زخمیوں کے علاج کی مانیٹرنگ کی جائے۔انہوں نے کہا کہ کمسن بچوں سمیت بے گناہ شہریوں کو شہید کر کے بھارت نے ننگی جارحیت کا ارتکاب کیاہے،بھارت کو بے گناہ شہریوں پر حملے کا خمیازہ بھگتنا ہوگا اور ایک ایک قطرے کا حساب دینا ہوگا۔
انہوں نے کہا کہ شہدا کا خون رائیگاں نہیں جائے گا،پوری قوم پاک فوج کے افسران اور سپاہیوں کو سلام پیش کرتی ہے جنہوں نے اپنی جانوں کی پرواہ کئے بغیر پاکستان کی سلامتی کی خاطردشمن کو ناکوں چنے چبوائے۔انہوں نے کہا کہ دنیا بھر میں بھارتی پائلٹ نا اہلی اور ناکامی کا استعارہ بن چکے ہیں ،بھارت کا غرور رافیل طیارے زمین پر ملبے کا ڈھیر بن چکے ہیں،بھارت نے آبی ذخائر پر حملہ کر کے عالمی قوانین کی واضح خلاف ورزی کی۔
وزیر اعلی مریم نواز نے،لاہور، گوجرانوالہ، چکوال، راولپنڈی، اٹک، بہاولپور او ردیگر شہروں میں پولیس، انتظامیہ و دیگر اداروں کو ہمہ وقت الرٹ رہنے کی ہدایت کی ہے،انہوں نے ڈرون حملو ں میں زخمیوں کی جلد صحت یابی کیلئے دعا بھی کی ۔
Short Link: https://urdu.app.com.pk/urdu/?p=594395
