اسلام آباد ۔ 10 جنوری (اے پی پی)وزیر خارجہ،سیکرٹری خارجہ،چیف آف جنرل سٹاف(سی جی ایس)،ڈی جی ایم او اور ڈی جی ایم آئی نے اسلام آباد میں تعینات غیر ملکی سفیروں/ہیڈز آف مشنز کو انسداد دہشت گردی کوششوں میں پاکستان کی کامیابیوں اورچیلنجوں،شدت پسندی کیخلاف جنگ،ایل اوسی اور ورکنگ باونڈری پر بھارتی سیز فائر کی خلاف ورزیوں اور مقبوضة کشمیر میں بھارتی مظالم کے حوالے سے تفصیلی بریفنگ دی۔ بدھ کو دفتر خارجہ کے ترجمان کے مطابق وزیر خارجہ خواجہ آصف نے شرکاءکا خیر مقدم کرتے ہوئے کہا کہ بریفنگ کا اہتمام غیر ملکی سفارتکاروں کو گزشتہ 16 سال کے دوران بڑے پیمانے پر پاکستان کی انسداد دہشت گردی کوششوں اور گزشتہ چار سال میں پیشرفت کے بارے میں آگاہ کرنے کیلئے کیا گیا ہے۔ غیر ملکی سفارتکاروں کو آپریشن ضرب عضب اور رد الفساد کی کامیابی کے بارے میں تفصیلات فراہم کر دی گئیں جس کے نتیجے میں پاکستان میں دہشت گردوں کا خاتمہ کر دیا گیا۔انہیں افغانستان میں دہشت گردوں کے محفوظ ٹھکانوں سے دہشت گردی کے خطرات کے بارے میں بھی بریف کیا گیا۔ ترجمان کے مطابق غیر ملکی سفیروں کو پاکستان کی انسداد دہشت گردی مہم کو ناکام بنانے کی غرض سے بھارتی کوششوں اور پاکستان کے اندرونی استحکام کو ختم کرنے کیلئے راءاور این ڈی ایس گٹھ جوڑ کے بارے میں بھی تفصیلات فراہم کر دی گئیں۔
