اسلام آباد۔24اگست (اے پی پی):نائب وزیر اعظم و وزیر خارجہ اسحاق ڈار 25 تا 26 اگست 2025 کو سعودی عرب کا دورہ کریں گے۔ اسحاق ڈار جدہ میں اسلامی تعاون تنظیم (او آئی سی) وزرائے خارجہ کونسل کے غیر معمولی اجلاس میں شریک ہوں گے۔ نائب وزیر اعظم ڈھاکا کے دورے کے بعد براہِ راست جدہ روانہ ہوں گے۔ اتوار کو دفتر خارجہ سے جاری بیان کے مطابق جدہ میں ہونے والے او آئی سی اجلاس میں فلسطین کی موجودہ صورتحال کے تناظر میں مشترکہ حکمت عملی پر غور ہوگا ۔
اسرائیلی جارحیت اور غزہ پر فوجی کنٹرول کے منصوبے پر بھی اجلاس میں تبادلہ خیال کیا جائے گا ۔او آئی سی وزرائے خارجہ فلسطینی عوام کے حقوق کی سنگین خلاف ورزیوں پر غور کریں گے ۔پاکستان ہمیشہ عالمی فورمز پر فلسطینی عوام کی حمایت کرتا رہا ہے۔ اسحاق ڈار اجلاس میں فلسطین کی غیر متزلزل حمایت کا اعادہ کریں گے۔ وزیر خارجہ اسرائیل کے زیرِ قبضہ تمام علاقوں بشمول یروشلم سے انخلا کا مطالبہ کرینگے۔
بیان میں کہا گیا ہے کہ پاکستان کی جانب سے غزہ پر اسرائیلی فوجی کنٹرول کے منصوبے کو مسترد کیا جائے گا، پاکستان فلسطینی عوام کے لئے فوری انسانی امداد کی ضرورت پر زور دے گا۔ اسحاق ڈار اجلاس میں فلسطینی ریاست کے قیام کے مطالبے کو دہرائیں گے ۔اس موقع پر اسحاق ڈار کی اہم رکن ممالک کے وزرائے خارجہ سے دو طرفہ ملاقاتیں بھی متوقع ہیں ۔
