اسلام آباد۔10نومبر (اے پی پی):وزیر خارجہ بلاول بھٹو زرداری نے سعودی عرب کے دارالحکومت ریاض میں خلیج تعاون کونسل کے (جی سی سی) کے سیکرٹری جنرل ڈاکٹر نائیف فلاح ایم الحجراف سے ملاقات کی۔ جمعرات کو دفتر خارجہ کے ترجمان کی جانب سے جاری بیان کے مطابق وزیر خارجہ نے برادر خلیجی ممالک کے ساتھ پاکستان کے تعلقات کی اہمیت کو اجاگر کرتے ہوئے کہا کہ پاکستان جی سی سی کو خطے میں ایک اہم تنظیم کے طور پر دیکھتا ہے جو پاکستان اور خلیجی ریاستوں کے درمیان سیاسی اور اقتصادی تعلقات کو مزید وسعت دینے میں اہم کردار ادا کرسکتا ہے۔
وزیر خارجہ اور خلیج تعاون کونسل کے سیکرٹری جنرل نے جی سی سی اور اس کے رکن ممالک کے ساتھ پاکستان کی جاری تعلقات اور تعاون کی صورتحال کا جائزہ لیا۔ وزیر خارجہ نے تعلقات کی رفتار پر اطمینان کا اظہار کرتے ہوئے اس کی رفتار کو آگے بڑھانے کی ضرورت پر زور دیا۔
وزیر خارجہ بلاول بھٹو زرداری نے پاکستان۔ جی سی سی آزاد تجارتی معاہدوں پر جاری مذاکرات کو جلد حتمی شکل دینے کی ضرورت پر زور دیا اور دونوں اطراف کی تکنیکی ٹیموں سے کہا کہ وہ اس مشترکہ مقصد کے حصول کے لیے اپنی کوششوں کو ہم آہنگ کریں۔ وزیر خارجہ نے کہا کہ پاکستان جی سی سی اور اس کے رکن ممالک کے ساتھ ادارہ جاتی روابط کو مزید مضبوط کرنا چاہتا ہے۔ انہوں نے کہا کہ پاکستان سٹریٹجک ڈائیلاگ کے اگلے دور کی میزبانی کے لیے تیار ہے جو جلد از جلد باہمی طور پر مناسب تاریخ پر اسلام آباد میں ہوگا۔
وزیر خارجہ اور خلیج تعاون کونسل کے سیکرٹری جنرل نے علاقائی اور عالمی مسائل بشمول بھارت کے غیر قانونی طور پر زیر قبضہ جموں و کشمیر ، افغانستان اور یمن کی صورتحال پر بھی تبادلہ خیال کیا۔ وزیر خارجہ نے سیکرٹری جنرل کو ان مسائل پر پاکستان کے موقف سے آگاہ کیا اور کہا کہ پاکستان اور جی سی سی ممالک کا مشترکہ مفادات کے تمام مسائل پر مفادات اور موقف یکساں ہیں۔
Short Link: https://urdu.app.com.pk/urdu/?p=336788
