اسلام آباد۔9مئی (اے پی پی):نائب وزیر اعظم اور وزیر خارجہ سینیٹر محمد اسحاق ڈار کو جاپان کے وزیر خارجہ ایوا تاکیشی نے جمعہ کو ٹیلیفون کیا۔
دفتر خارجہ کے مطابق نائب وزیر اعظم نے انہیں پاکستان کے متعدد شہروں پر بھارت کے غیر قانونی اور بلا اشتعال حملوں کی وجہ سے پیدا ہونے والی علاقائی صورتحال سے آگاہ کیا جس کے نتیجے میں خواتین، بچوں اور بزرگوں سمیت بے گناہ شہری شہید ہوئے۔
انہوں نے کہا کہ بھارتی جارحیت سے علاقائی امن و سلامتی کو خطرہ ہے، پاکستان نے بین الاقوامی قوانین اور اقوام متحدہ کے چارٹر کی ان خلاف ورزیوں کے پیش نظر تحمل کا مظاہرہ کیا ہے۔
انہوں نے کہا کہ حکومت پاکستان ملک کی خود مختاری اور علاقائی سالمیت کے دفاع کے لیے پرعزم ہے۔ جاپان کے وزیر خارجہ نے بدلتی ہوئی صورتحال پر گہری تشویش کا اظہار کیا اور معصوم شہریوں کی جانوں کے ضیاع پر تعزیت کا اظہار کیا۔ انہوں نے زور دیا کہ دونوں فریقین تحمل کا مظاہرہ کریں، خطے میں امن و استحکام کے حصول کے لیے مذاکرات اور سفارت کاری کی اجازت دی جائے۔
Short Link: https://urdu.app.com.pk/urdu/?p=594939
