لندن ۔ 4 فروری (اے پی پی) وزیر خارجہ شاہ محمود قریشی نے کہا ہے کہ وہ انٹرنیشنل کشمیرکانفرنس کے ذریعے عالمی ضمیر کو جھنجھوڑ نے کی کوشش کریں گے تاکہ نہتے کشمیریوں پر ظلم و ستم کا سلسلہ بند ہو سکے۔ پیر کو کشمیر انٹرنیشنل کانفرنس لندن کے حوالے سے میڈیا سے خصوصی گفتگو کرتے ہوئے انہوں نے کہا کہ کشمیر ڈے اس سال پورے پاکستان میں کشمیریوں کے ساتھ اظہار یکجہتی کے طور پر منایا جائے گا،اس دفعہ ہم لندن میں انٹرنیشنل کشمیر کانفرنس کا انعقاد کر رہے ہیں۔ انہوں نے کہا کہ سینٹ کی پارلیمانی کمیٹی برائے امور خارجہ کے ساتھ مل کر ہم لندن میں مظلوم کشمیری بھائیوں کا مقدمہ لڑنے جا رہے ہیں،مجھے خوشی ہے کہ برطانوی پارلیمنٹ کے ممبران میں بھی کشمیر کی صورتحال کے حوالے سے خاصی تشویش پائی جاتی ہے۔ وزیر خارجہ نے کہا کہ آل پارٹیز پارلیمانی گروپ کی 30 اکتوبر کو جاری ہونے والی رپورٹ میں کشمیر میں انسانی حقوق کی سنگین خلاف ورزیوں کے حوالے سے چشم کشا انکشافات موجود ہیں، اقوام متحدہ کے انسانی حقوق کمیشن کی حالیہ رپورٹس نے بھی نہتے کشمیریوں پر بھارتی مظالم کا پردہ چاک کیا ہے۔ شاہ محمود قریشی نے کہا کہ کشمیر کے مسئلے پر اور پاکستان کی ترجیحات پر پاکستان کی تمام سیاسی جماعتوں کا موقف ایک ہے ۔ہمارا حریت کی قیادت سے بھی رابطہ ہے ہم کشمیر انٹرنیشنل کانفرنس کے ذریعے عالمی ضمیر کو جھنجھوڑ نے کی کوشش کریں گے تاکہ نہتے کشمیریوں پر ظلم و ستم کا یہ سلسلہ بند ہو سکے۔
Short Link: https://urdu.app.com.pk/urdu/?p=132925
