اسلام آباد۔22اکتوبر (اے پی پی):وزیر خارجہ مخدوم شاہ محمود قریشی نے جمعرات کو ازبکستان کے وزیر خارجہ عبدالعزیز کمیلوف کے ساتھ ٹیلیفونک رابطہ کیا۔ بات چیت کے دوران دوطرفہ تعلقات، علاقائی صورتحال سمیت باہمی دلچسپی کے امور پر تبادلہ خیال کیاگیا۔ دونوں وزراءخارجہ نے پاکستان اور ازبکستان کے مابین دوطرفہ تجارت کا حجم بڑھانے پر اتفاق کیا۔وزیر خارجہ نے کہا کہ پاکستان اور ازبکستان کے مابین گہرے برادرانہ مراسم ہیں۔ دونوں ممالک کی قیادت پاکستان اور ازبکستان کے مابین دو طرفہ تعلقات کو مزید مستحکم بنانے کیلئے پر عزم ہے۔وزیر خارجہ مخدوم شاہ محمود قریشی نے کورونا وبا کے دوران، ازبکستان میں مقیم پاکستانی کمیونٹی کا خصوصی خیال رکھنے پرازبک اپنے ہم منصب کا شکریہ ادا کیا اور کہا کہ پاکستان اور ازبکستان کے درمیان دوطرفہ سیاسی مشاورت کا افتتاحی دور اسلام آباد میں جلد منعقد ہوگا۔ دونوں وزراءخارجہ نے پاکستان اور ازبکستان کے مابین دوطرفہ تجارت کا حجم بڑھانے پر اتفاق کیا۔شاہ محمود قریشی نے کہا کہ پاکستان افغانستان سمیت خطے میں قیام امن کیلئے اپنی مصالحانہ کوششیں جاری رکھنے کیلئے پر عزم ہے ۔وزیر خارجہ مخدوم شاہ محمود قریشی نے ازبکستان کو دی گئی دورہ پاکستان کی دعوت کو دہرایا۔ازبک وزیر خارجہ نے، وزیر خارجہ مخدوم شاہ محمود قریشی کا شکریہ ادا کرتے ہوئے، وبائی صورتحال میں بہتری کے بعد دورہ پاکستان پر آمادگی کا اظہار کیا۔دونوں وزراءخارجہ نے اہم دوطرفہ و اہم علاقائی امور پر مشاورت کا سلسلہ جاری رکھنے پر بھی اتفاق کیا۔
