اسلام آباد۔15مئی (اے پی پی):وزیر خارجہ مخدوم شاہ محمود قریشی نے اسرائیلی فوج کی جارحیت اور مسجد اقصٰی پر جاری حملوں کی شدید مذمت کرتے ہوئے معصوم فلسطینیوں بالخصوص بچوں کی شہادت پر گہرے دکھ اور افسوس کا اظہار کیا اور اپنے فلسطینی ہم منصب کو، عالمی برادری کی توجہ، فلسطین میں جاری اسرائیلی فوج کی جارحیت کی طرف مبذول کروانے اور مسئلہ فلسطین کے پر امن حل کیلئے پاکستان کی سفارتی کاوشوں سے آگاہ کیا اورکہا کہ پاکستان، فلسطینی عوام کی اس حق خود ارادیت کی جدوجہد کی حمایت جاری رکھنے کیلئے پر عزم ہے۔
ان خیالات کا اظہار انہوں نے فلسطینی وزیر خارجہ ڈاکٹر ریاض المالکی سے ٹیلی فون پر بات چیت کرتے ہوئے کیا۔ دفتر خارجہ کی طرف سے جاری بیان کے مطابق وزیر خارجہ مخدوم شاہ محمود قریشی کا رات گئے اس سلسلہ میں فلسطینی وزیر خارجہ ڈاکٹر ریاض المالکی کے ساتھ ٹیلیفونک رابطہ ہوا ہے۔ دونوں وزرائے خارجہ نے فلسطین کی موجودہ صورتحال پر تبادلہ خیال کیا۔
وزیر خارجہ نے اسرائیلی فوج کی جارحیت اور مسجد اقصٰی پر جاری حملوں کی شدید مذمت کرتے ہوئے معصوم فلسطینیوں بالخصوص بچوں کی شہادت پر گہرے دکھ اور افسوس کا اظہار کیا۔ انہوں نے کہا کہ پاکستان، فلسطینی عوام کی اس حق خود ارادیت کی جدوجہد کی حمایت جاری رکھنے کیلئے پر عزم ہے۔ وزیر خارجہ نے فلسطینی ہم منصب کو، عالمی برادری کی توجہ، فلسطین میں جاری اسرائیلی فوج کی جارحیت کی طرف مبذول کروانے اور مسئلہ فلسطین کے پر امن حل کیلئے پاکستان کی سفارتی کاوشوں سے بھی آگاہ کیا۔
انہوں نے کہا کہ وزیر اعظم عمران خان نے فلسطینی صدر کو ٹیلیفون کے ذریعے، اس حق خود ارادیت کی جدوجہد میں پاکستان کی جانب سے مکمل حمایت کا یقین دلایا ہے۔وزیر خارجہ نے اس مشکل گھڑی میں، پاکستانی قوم کی جانب سے بھی اپنے فلسطینی بھائیوں کے ساتھ اظہار یکجہتی کیا۔
فلسطینی وزیر خارجہ ڈاکٹر ریاض المالکی نے وزیر خارجہ مخدوم شاہ محمود قریشی کو فلسطین کی موجودہ صورتحال سے آگاہ کرتے ہوئے، کشیدگی میں کمی لانے کیلئے جاری کاوشوں سے آگاہ کیا۔ فلسطینی وزیر خارجہ نے مسئلہ فلسطین کے حوالے سے پاکستان کے واضح، دو ٹوک اور اصولی موقف کو سراہتے ہوئے، علاقائی اور عالمی سطح پر پاکستان کی سفارتی معاونت پر پاکستان کی قیادت اور وزیر خارجہ مخدوم شاہ محمود قریشی کا شکریہ ادا کیا۔
دونوں وزرائے خارجہ نے فلسطین کی کشیدہ صورتحال پر مشاورت کا سلسلہ جاری رکھنے کا فیصلہ کیا۔ وزیر خارجہ مخدوم شاہ محمود قریشی کا فلسطینی ہم منصب کے ساتھ یہ رابطہ، فلسطین کی صورتحال پر مشترکہ لائحہ عمل اختیار کرنے کے حوالے سے اسلامی ممالک کے ساتھ کیے جانیوالے سفارتی روابط کی کڑی ہے۔
