اسلام آباد ۔ 18 جون (اے پی پی) وزیر خزانہ سینیٹر اسحاق ڈار نے فیڈرل بورڈ آف ریونیو(ایف بی آر)پر زور دیا ہے کہ رواں مالی سال2016-17 کے کیلئے ٹیکس وصولیوں کے اہداف کے حصول کیلئے ہر ممکنہ اقدامات اٹھائے جائیں ۔ہفتہ کو یہاں وزارت خزانہ نے ایف بی آر سے متعلقہ امور کے جائزہ لے حوالے سے اجلاس کی صدارت کرتے ہوئے وزیر خزانہ نے کہا کہ موجودہ حکومت کی موثر پالیسیوں اور ایف بی آر کی کوششوں کی بدولت 2012-13 اور 2015-16 کے دوران ٹیکس محصولات میں 60 فیصد اضافہ ہوا ہے۔انہوں نے ایف بی آر کو آئندہ مالی 2017-18 کیلئے طے شدہ اہداف کے حصول کیلئے مکمل تعاون کی یقین دہانی کرائی، انہوں نے آئندہ مالی سال 2017-18 کے وفاقی بجٹ کی تیاریوں میں ایف بی آر حکام کے کردار کو سراہا جو پارلیمنٹ سے منظور ہوچکا ہے۔انہوں نے توقع ظاہر کی کہ آئندہ مالی سال کے بجٹ میں اعلان کئے گئے اقدامات سے عام آدمی کی زندگی میں خوشحالی آئے گی اور ان کا معیار زندگی بلند ہوگا جبکہ پاکستان اعلیٰ پائیدار اور خصوصی اقتصادی ترقی کے حصول میں کامیاب ہوگا قبل ازیں ایف بی آر کے چیئرمین نے مالی سال2016-17 کے دوران ٹیکس وصولیوں کی صورتحال سے آگاہ کیا۔
