بغداد۔2اگست (اے پی پی):وفاقی وزیر داخلہ رانا ثناء اللہ خان نے دورہ عراق کے دوران اپنے عراقی ہم منصب عبدالامیر الشماری سے ملاقات کی جس میں اربعین کے دوران پاکستانی زائرین کا کوٹہ پچاس ہزار سے ایک لاکھ کرنے،پاکستانی زائرین کو گروپ ویزہ کے علاوہ پاکستان میں عراقی سفارت خانے سے انفرادی ویزہ جاری کرنے اورپاکستانی زائرین کیلئے ویزہ فیس میں کمی پر اتفاق کیا گیا۔
وزیرداخلہ راناثناء اللہ نے شاندار مہمان نوازی اور زائرین کو سہولیات کی فراہمی پر عراقی ہم منصب کا شکریہ ادا کیا۔انہوں نےکہا کہ پاکستان عراق کی خودمختاری اور علاقائی سالمیت کا احترام کرتا ہے ۔دہشت گردی کے شکار عراق کی تعمیر نو کی کوششوں کی بھرپور حمایت کرتے ہیں۔ انہوں نے کہا کہ عراق پاکستان کے اداروں کی انسداد دہشت گردی میں مہارت سے فائدہ اٹھا سکتا ہے۔
عراقی وزیر داخلہ نے دورہ کرنے پر وزیر داخلہ رانا ثناء اللہ خان کا شکریہ ادا کیا۔ عراقی وزیر داخلہ نے کہا کہ پاکستانی زائرین کو ہرممکن سہولت فراہم کرنے کیلئے کوشاں ہیں۔ پولیس اکیڈمی اور فرانزک کے شعبہ میں عراقی افسران اور کیڈٹس کی تربیت کی پیشکش کا خیرمقدم کرتے ہیں۔
