وزیر داخلہ چوہدری نثار علی خان کا ایف آئی اے کی جانب سے بلاگرز کے خلاف مقدمہ درج کئے جانے کی خبر کا سخت نوٹس
اس بات کا تعین کیا جائے کہ ایف آئی اے کیوں اس سلسلہ میں غیر ضروری مستعدی اور بلاجواز فعالیت کا مظاہرہ کرنا چاہ رہی ہے، وزیر داخلہ کی ہدایت
اسلام آباد ۔ یکم فروری (اے پی پی) وفاقی وزیر داخلہ چوہدری نثار علی خان نے وفاقی تحقیقاتی ادارہ ایف آئی اے کی جانب سے بلاگرز کے خلاف مقدمہ درج کئے جانے کی خبر کا سخت نوٹس لیتے ہوئے ہدایت کی ہے کہ اس بات کا تعین کیا جائے کہ ایف آئی اے کیوں اس سلسلہ میں غیر ضروری مستعدی اور بلاجواز فعالیت کا مظاہرہ کرنا چاہ رہی ہے۔ بدھ کو وزارت داخلہ کی طرف سے جاری بیان کے مطابق وزیر داخلہ نے کہا کہ یہ کیسے ممکن ہے کہ ایف آئی اے بغیر تحقیق و تفتیش کسی کے خلاف مقدمہ درج کرے۔ انہوں نے کہا کہ بلاگرز اور ان کے خاندان گذشتہ کئی روز سے ایک مشکل صورتحال سے دوچار رہے ہیں۔ انہوں نے کہا کہ ایف آئی اے کو کس نے یہ اختیار دیا ہے کہ وہ ان کی پریشانی میں اضافہ کرے۔
