لندن ۔ 23 ستمبر (اے پی پی) وزیر دفاع انجنیئر خرم دستگیر خان نے کہا ہے کہ سیالکوٹ ورکنگ باﺅنڈری پر شہید ہونے والے افراد کے لواحقین سے دلی تعزیت کرتا ہوں اور زخمیوں کی جلد صحت یابی کے لیے دعا گو ہوں۔ لائن آف کنٹرول پر بھارتی جارحیت اور سرحدی خلاف ورزی کا ہمیشہ ہی بھرپور اور موثر جواب دیا جاتا ہے‘ بھارت ہمارے معصوم اور نہتے شہریوں کو نشانہ بناتا ہے جبکہ پاکستان کی جانب سے بھارتی آرمی کے مورچوں کو نشانہ بنایا جاتا ہے۔ ان خیالات کا اظہار انہوں نے ہفتہ کو ایک نجی ٹی وی چینل کے پروگرام میں گفتگو کرتے ہوئے کیا۔ انہوں نے کہا کہ بھارتی گولہ باری کے جواب میں بھارت میں بھی لوگ مارے جاتے ہیں لیکن وہ اسے مشتہر نہیں کرتے۔ انہوں نے کہا کہ بطور وزیردفاع کہتا ہوں کہ بھارت ہمارے صبر کا امتحان نہ لے تو یہی بہتر ہے اور ہمارے ڈی جی ایم او نے بھی بھارت کو یہی بات باور کرائی ہے کہ یہ بات اب یہیں بند کر دیں تو بہتر ہے۔
Short Link: https://urdu.app.com.pk/urdu/?p=70833
