لاہور۔12مارچ (اے پی پی):صوبائی وزیر زراعت و لائیو سٹاک سید عاشق حسین کرمانی کی زیر صدارت ایگریکلچر ہائوس لاہور میں اہم اجلاس منعقد ہوا جس میں بجٹ 2025۔26 کے لیے وزیر اعلی پنجاب کے زرعی شعبہ کی ترقی کیلئے منصوبوں کی تجاویز کو حتمی شکل دی گئی۔ اجلاس میں ٹرانسفارمنگ ایگریکلچر پنجاب کے تحت وزیر اعلی ہائی ٹیک میکانائزیشن بینک فنانسنگ پروگرام اور وزیر اعلی پنجاب انشیٹیوز کے لحاظ سے مختلف تجاویز پر غور کیا گیا۔ اس موقع پر سیکرٹری زراعت پنجاب افتخار علی سہو بھی موجود تھے۔ وزیر زراعت و لائیو سٹاک نے کہا کہ وزیر اعلی پنجاب صوبہ میں زرعی میکانائزیشن کے فروغ کے لیے پرعزم ہیں جس کے حصول کیلئے آئندہ دو سالوں میں 35ارب روپے کی فنانسنگ کی جائے گی، کسانوں /سروس پروائیڈرز کو فی کس 5 کروڑ روپے تک کا بلا سود زرعی قرضہ بینکوں کے ذریعے فراہم کیا جائے گا۔
انھوں نے کہا کہ اس اسکیم کے تحت چھوٹے سروس پروائیڈرز مستفید ہوں گے جن کے پاس دو یا تین پرانی زرعی مشینیں ہوں گی، انھیں ایک نئی مشین دی جائے گی۔انھوں نے فیلڈ ونگ(محکمہ زراعت) کو ڈویژن کی سطح پر سروس پروائیڈرز کے ساتھ رابطہ کرکے انہیں گورنمنٹ کی اس اسکیم کی افادیت اور اس سے مستفید ہونے کی ہدایت کی،اس پروگرام کو اگلے مالی سال کے بجٹ میں پلائیٹ پراجیکٹ کے طور پر لانچ کیا جائے گا،اگر کاشتکاروں اور سروس پروائیڈرز نے اس میں اپنی دلچسپی دکھائی تو اس کے سائز اور سکیل کو مزید بڑھا دیا جائے گا۔سید عاشق حسین کرمانی نے کہا کہ پنجاب میں تمام مشینیں فراہم کرنے والے ڈیلرز کو رجسٹرد کرنا بھی ضروری ہے،کسان کارڈ کے دوسرے فیز میں چھوٹے اور درمیانے درجے کے 25ایکڑ تک اراضی رکھنے والے کاشتکاروں کو شامل کیا جائے گا اور فی ایکڑ قرض کی حد میں اضافہ کرکے 40ہزار روپے رکھی جائے گی اور فی ایکڑ پروسیسنگ فیس کو بھی کم کیا جائے گا تاکہ کسان دوست اسکیم کے تحت زیادہ سے زیادہ کاشتکار اس سے فائدہ اٹھا سکیں جبکہ ٹوٹل75ارب روپے کی رقم مختص کی جائے گی۔انھوں نے کہا کہ کھاد
بیج اورزرعی ادویات کے ساتھ ڈیزل خریدنے کی سہولت بھی کاشتکار کو دستیاب ہو گی۔ وزیراعلی پنجاب گرین ٹریکٹر پروگرام فیز ون کے تحت 9500 قرعہ اندازی میں کامیاب کاشتکاروں میں سے 8300 کسانوں کو ٹریکٹرز ڈلیور ہو چکے ہیں اور باقیوں کو 31مارچ تک حوالے کر دیئے جائیں گے،گرین ٹریکٹر فیز ٹو پروگرام کیلئے اگلے مالی سال میں 60ہارس پاور سے 85ہارس پاور کے 9500ٹریکٹرز کسانوں کو فراہم کیے جائیں گے۔ وزیر اعلی پنجاب سولرائزیشن آف زرعی ٹیوب ویلز پروگرام کے تحت وزیراعلی کی جانب سے ڈیجیٹل قرعہ اندازی کے ذریعے 8ہزار کسانوں کو الاٹمنٹ لیٹرز جاری کر دیئے گئے ہیں جبکہ زرعی ٹیوب ویلز سولرآیزیشن 12سروس اینڈ سپلائیز کمپنیاں آن بورڈ ہیں، سولرآیزیشن آف زرعی ٹیوب ویل کے فیز ٹو کیلئے تجاویز بھی زیر غور ہیں۔ صوبائی وزیر زراعت نے مزید کہا کہ پنجاب میں 4 ماڈل ایگریکلچر مالز کے قیام کے سلسلے میں تعمیراتی کام تکمیل کے آخری مراحل میں ہیں
ساہیوال کا مال 15اپریل تک مکمل ہو جائے گاجبکہ حکومت نے اگلے مالی سال کے بجٹ میں 10ماڈل ایگریکلچر مالز تعمیر کرنے کا منصوبہ بنایا ہوا ہے۔ وزیر اعلی پنجاب کے زیادہ گندم آگائو پروگرام کے تحت ایک ہزار ٹریکٹرز کے لیے اب تک 21ہزار 500کسانوں کی فزیکل وریفیکشن مکمل ہو گئی ہے جن میں سے ایک ہزار خوش نصیب کاشتکاروں کے نام وزیر اعلی پنجاب اس ماہ ڈیجیٹل قرعہ اندازی کے ذریعے نکالیں گی۔انہوں نے کہاکہ وزیر اعلی پنجاب کے سموگ کنٹرول پروگرام کے تحت1 ہزار سپر سیڈرز کی فراہمی مکمل ہو چکی ہ،اس پروگرام کے دوسرے مرحلہ کے دوران اب تک2 ہزار کاشتکاروں کو سپرسیڈرز کی فراہمی کیلئے الاٹمنٹ لیٹرز جاری کر دیئے گئے ہیں جبکہ اگلے مالی سال کے بجٹ میں بھی کاشتکاروں کو 5ہزار سپرسیڈرز فراہم کیے جائیں گے۔ صوبائی وزیر زراعت نے مزید کہا کہ آئندہ مالی سال کے بجٹ میں 2ہزار زرعی گریجویٹس کو انٹرن شپ پر بھرتی کیا جائے گا، تمام منصوبوں کی حتمی منظوری وزیر اعلی پنجاب دیں گی۔
سیکرٹری زراعت افتخار علی سہو نے کہا کہ زراعت کے شعبہ میں جدید مشینری کے استعمال کے بغیر پیداواری اہداف کا حصول ممکن نہیں،وزیر اعلی پنجاب ہائی ٹیک میکناائزیشن پروگرام کے تحت 10اقسام کی مشینری سروس پروائیڈرز کے ذریعے کرایہ پر فراہم کی جائے گی تاکہ صوبہ میں زرعی میکانائزیشن کو فروغ مل سکے۔ اجلاس میں اسپشل سیکرٹری زراعت آغا نبیل اختر، ایڈیشنل سیکرٹری زراعت(پلاننگ) کیپٹن(ر) وقاص رشید،ڈائریکٹر جنرلز زراعت نوید عصمت کاہلوں،چوہدری عبدالحمید، ساجد اور بنک آف پنجاب کے نمائندوں سمیت دیگر افسران موجود تھے۔
Short Link: https://urdu.app.com.pk/urdu/?p=571673
