اسلام آباد۔6فروری (اے پی پی):وزیر مملکت برائے آئی ٹی و ٹیلی کمیونیکیشن شزا فاطمہ خواجہ سے ترکیہ کے سفیر عرفان نذیر اوغلو نے ملاقات کی جس کے دوران پاکستان اور ترکیہ کے درمیان آئی ٹی،فائیوجی اور مصنوعی ذہانت کے شعبوں میں تعاون کو فروغ دینے پر اتفاق کیا گیا۔جمعرات کو وزارت انفارمیشن ٹیکنالوجی اور ٹیلی کمیونیکیشن سے جاری کردہ بیان کے مطابق ملاقات کے دوران ڈیجیٹل ٹرانسفارمیشن، ای۔گورننس اور سمارٹ ٹیکنالوجیز میں اشتراک کے مواقع پر تبادلہ خیال کیا گیا۔
ملاقات میں پاکستان اور ترکیہ کے درمیان ڈیجیٹل ترقی، روزگار کے مواقع اور اقتصادی استحکام کے فروغ پر اتفاق کیا گیا ۔پاکستان کے نیشنل آئی ٹی بورڈ اور ترکیہ کے ترک سیٹ کے درمیان بی ٹوبی تعاون پر غور کیا گیا ۔وزیر مملکت برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے کہا کہ پاکستان سافٹ ویئر ایکسپورٹ بورڈ (پی ایس ای بی) بین الاقوامی آئی ٹی تعاون کے فروغ کےلئےپرعزم ہے، ڈیجیٹل معیشت میں مہارت ڈگری سے زیادہ اہمیت رکھتی ہے، سکل ڈویلپمنٹ کو فروغ دینا ہوگا۔
انہوں نے کہا کہ ڈیجیٹل نیشن پاکستان بل کے نفاذ سے معیشت، ای۔گورننس اور ڈیٹا ایکسچینج میں بڑی پیشرفت ہوگی۔ ترکیہ کے سفیر عرفان نذیر اوغلو نے کہا کہ پاکستان اور ترکیہ کے درمیان آئی ٹی، ٹیلی کام اور ڈیجیٹل بزنس میں اشتراک ضروری ہے، ترکیہ میں 67 ملین افراد ای۔گورننس سسٹم سے مستفید ہو رہے ہیں اور 8,000 ڈیجیٹل سروسز فعال ہیں۔
