اسلام آباد ۔ 13 جنوری(اے پی پی)وزیر مملکت برائے داخلہ شہر یار خان آفریدی نے میڈیا پر خود سے منسوب خبروں کی تردید کرتے ہوئے کہا ہے کہ اسلام آباد سمیت ملک بھر میں منشیات کے خلاف مہم انہوں نے شروع کی، میرا اور وزیراعظم عمران خان کا وژن ملک کو منشیات سے بنانا ہے۔ اتوار کو اپنے ایک بیان میں وزیر مملکت نے کہا کہ منشیات کے خلاف مہم میں وزیر اعظم عمران خان کی پشت پناہی حاصل ہے، چند مجرمانہ ذہنیت کے لوگ میرے ساتھ تصاویر بنا کر سوشل میڈیا پر ڈال رہے ہیں، میں عام سیاسی ورکر ہوں، کسی کو اپنے ساتھ تصویر لینے سے منع نہیں کرسکتا۔ انہوں نے کہا کہ دوران مہم اگر کوئی میرے ساتھ تصویر بنا کر استعمال کر رہا ہے تو اس سے میرا کوئی تعلق نہیں، میں نے ان لوگوں کے خلاف ہاتھ ڈالا ہے اس لیے یہ میری شہرت کو نقصان پہنچا رہے ہیں۔ انہوں نے کہا کہ منشیات کی روک تھام کیلئے سڑکوں اور بسوں پر آگاہی مہم چلا رہا ہوں، میرا اور وزیراعظم عمران خان کا وژن ملک کو ڈرگ فری بنانا ہے۔
