وزیر مملکت برائے کیڈ ڈاکٹر طارق فضل چوہدری کانیشنل انسٹیٹوٹ آف سپیشل ایجوکیشن اسلام آباد میں خصوصی بچوں کے ساتھ جشن آزادی کی تقریب سے خطاب
اسلام آباد ۔ 14 اگست (اے پی پی) وزیر مملکت برائے کیڈ ڈاکٹر طارق فضل چوہدری نے کہا ہے کہ 70 سالوں میں پاکستان نے اسلامی ممالک میں نمایاں مقام حاصل کیااور پاکستان واحد ایٹمی اسلامی ملک ہے،یوم آزادی پر ہم بھی یہ عہد کرتے ہیں کہ وطن کی ترقی کا عمل جاری رکھیں گے،ملک سے دہشتگردی، لوڈ شیڈنگ اور جہالت کا خاتمہ کریں گے، بچوں کے ملک کےلئے جذبات کو سلام پیش کرتے ہیں،ہم بھی انہی جذبات کے ساتھ ملکی نظام کو درست کرنے کے لئے کام کریں گے۔ پاکستان کو ایشیائی ٹائیگر اور اسلام کا قلعہ بنائیں گے۔ان خیالات کا اظہار انہوں نے پیر کو نیشنل انسٹیٹوٹ آف سپیشل ایجوکیشن اسلام آباد میں خصوصی بچوں کے ساتھ جشن آزادی کی تقریب سے خطاب کرتے ہوئے کیا۔وزیر مملکت نے خصوصی بچوں کے ہمراہ پرچم کشائی کی اور جشن آزادی کا کیک کاٹا۔خصوصی بچوں نے قومی ترانے اور ملی نغموں پر اشاروں کی زبان میں پرفارم کیا۔تقریب میں کیڈ کے دیگر تعلیمی اداروں سے آئے طلباء و طالبات نے بھی پرفارم کیا۔ اس موقع پر تقریب سے خطاب کرتے ہوئے وزیر مملکت نے کہا کہ ملک کے 70ویں یوم آزادی کو خصوصی بچوں کے ساتھ منانے کا فیصلہ کیا،بصارت سے محروم بچے ملی نغمے میں یہ عہد کر رہے ہیں کہ وطن سے اندھیرے مٹا ئیں گے۔ ہمارے بھی ایسے جذبات ہونے چاہیئیں۔
Short Link: https://urdu.app.com.pk/urdu/?p=66120
