اسلام آباد۔26اگست (اے پی پی):فیڈرل بورڈ آف انٹر میڈیٹ اینڈ سیکنڈری ایجوکیشن اسلام آباد نے سال 2025 جماعت گیارہویں اور بارہویں کے سالانہ امتحانات کے نتائج کا اعلان کردیا ۔فیڈرل بورڈ کی جانب سے جاری نتائج کے مطابق گیارہویں جماعت میں پاس ہونے والے طلباء کا تناسب 62.40 فیصد جبکہ بارہویں جماعت میں کامیابی کا تناسب 83.19 فیصد رہا ۔وفاقی تعلیمی بورڈ کی جانب سے جاری نتائج کے مطابق انٹرمیڈیٹ کے میڈیکل گروپ میں آرمی پبلک سکول اینڈ کالج پاسبان برائے خواتین راولپنڈی کنٹونمنٹ سے تعلق رکھنے والی علینا طاہر نے 1071 نمبر لے کر پہلی پوزیشن حاصل کی ۔
سکالرز سائنس کالج دی مال لالہ رخ واہ کنیٹ سے وردہ سرفراز نے 1070 نمبر لے کر دوسری ، آرمی پبلک سکول اینڈ کالج گرلز ہمایوں روڈ راولپنڈی کینٹ سے عروا ملک نے 1069 اور آرمی پبلک سکول اینڈ کالج گوجرانوالہ کینٹ سے مناہل مرتضیٰ نے بھی 1069 نمبر لے کر تیسری پوزیشن حاصل کی ۔اسی طرح پری انجینئرنگ گروپ میں سکالرز سائنس کالج دی مال لالہ رخ واہ کینٹ سے تعلق رکھنے والے مزمل ساجد نے 1063 نمبر لے کر پہلی ، کیپس کالج واہ کینٹ کیمپس کوہستان انکلیو جی ٹی روڈ واہ کینٹ سے محمد سمیع نے 1059 نمبر حاصل کر کے دوسری ، آرمی پبلک سکول فورٹ روڈ راولپنڈی کینٹ سےعائشہ نعیم نے 1054 نمبر لے کر تیسری پوزیشن حاصل کی ۔
سائنس جنرل گروپ میں آرمی پبلک سکول فورٹ روڈ راولپنڈی کینٹ سے تعلق رکھنے والے ضیام روہاب 1056 لے کر پہلی پوزیشن حاصل کی ۔پنجاب کالج ہل کیمپس سیکٹر H-11/4 اسلام آباد سے عیشاء زیدی نے 1055 نمبر لے کر دوسری ،پنجاب کالج ہل کیمپس سیکٹر H-11/4 اسلام آباد سے حلیمہ ذوہیب نے 1053 نمبر لے کر تیسری پوزیشن حاصل کی۔کامرس گروپ میں پنجاب کالج ہل کیمپس سیکٹر H-11/4 اسلام آباد سے جنت نذیر نے 1025 نمبر لے کر پہلی، شایزہ ماہ نور نے 1020 نمبر لے کر دوسری ، زینب وقار 1013 نمبر حاصل کر کے تیسری پوزیشن حاصل کی ۔
ہیومنٹیز گروپ میں پاکستان انٹرنیشنل سکول سعودی عربیہ سے دینہ خان 986 نمبر لے کر پہلی پوزیشن ، انسٹیٹیوٹ آف اسلامک سائنسز سترہ میل اسلام آباد سے طلحہ شمس نے 981، پنجاب کالج ہل کیمپس سیکٹر H-11/4 اسلام آباد سے زوہا نے بھی 981 نمبر لے کر دوسری ،پاکستان انٹرنیشنل سکول تاج سعودی عربیہ سے سدرہ نے 974 نمبر حاصل کر کے تیسری پوزیشن حاصل کی ۔تقریب سے خطاب کرتے ہوئے چیئرمین وفاقی تعلیمی بورڈ ڈاکٹر اکرام علی ملک نے وفاقی مہمان فیڈرل پارلیمانی سیکرٹری برائے فیڈرل ایجوکیشن اینڈ پروفیشنل ٹریننگ وجیہہ قمر کو امتحانی نظام کے بارے میں بریف کیا اور پوزیشن حاصل کرنے والے بچوں کو مبارکباد پیش کی ۔
اس موقع پر مہمان خصوصی وجیہہ قمر نے خطاب کرتے ہوئے کہا کہ آپ کو دیکھ کر ہمارا سر فخر سے بلند ہو جاتا ہے کہ اگر کبھی ہماری نسل سے کہیں کوئی غلطیاں ہوئیں یا کچھ کمی رہ گئی تو آپ ہم سے کہیں بہتر لوگ ہیں، آپ ہم سے زیادہ محبِ وطن ہیں، آپ میں ہم سے زیادہ رحمدلی اور ہمدردی ہے، جب میں آپ لوگوں کو دیکھتی ہوں تو یہی سمجھتی ہوں کہ اس ملک کا مستقبل ہم سے بہتر لوگوں کے ہاتھ میں ہے، آپ سب کو بہت بہت مبارک ہو ۔
اس موقع فیڈرل سیکرٹری ندیم محبوب نے کہا کہ فیڈرل بورڈ کی حالیہ اصلاحات اور شفاف امتحانی نظام اس بات کا ثبوت ہیں کہ آج بھی میرٹ اور نظم و ضبط کی پاسداری کی جا رہی ہے،چیئرمین اور ان کی ٹیم نے جس طرح امتحانات، انسپکشن اور مارکرز کے انتخاب میں شفافیت کو یقینی بنایا ہے وہ قابلِ تحسین ہے،آج کے اصل مہمان خصوصی ہمارے طلبہ ہیں خصوصاً وہ جنہوں نے نمایاں کامیابیاں حاصل کی ہیں، یہ دن ان کی زندگی کا یادگار لمحہ ہے
