اسلام آباد۔30جنوری (اے پی پی):وفاقی حکومت کے حجم کی درستگی کے لیے قائم کابینہ کمیٹی کے اجلاس میں وزارت اطلاعات و نشریات اور قومی ورثہ و ثقافت ڈویژن کی تنظیم نو سے متعلق سفارشات پیش کر دی گئیں۔وزارت خزانہ کی جانب سے جاری بیان کے مطابق کمیٹی کااجلاس جمعرات کو یہاں وفاقی وزیر خزانہ سینیٹر محمد اورنگزیب کی زیر صدارت منعقدہوا۔اجلاس میں وزارت اطلاعات و نشریات اور قومی ورثہ و ثقافت ڈویژن کی تنظیم نو سے متعلق سفارشات کا جائزہ لیا گیا۔
اجلاس میں سفیر عمومی سلمان احمد کی سربراہی میں ذیلی کمیٹی نے سفارشات پیش کیں۔جامع مشاورت، ماتحت محکموں کے دائرہ کار اور عوامی پالیسی پر اثرات کا تفصیلی جائزہ لینے کے بعد یہ سفارشات مرتب کی گئیں۔سفارشات میں محکمانہ استعداد، موثر سرگرمیوں اور عوامی خدمات کی بہتری پر توجہ دی گئی ہے۔ذیلی کمیٹی نے اپنی رپورٹ میں انضمام،افعال کی منتقلی، فریق ثالث کے آڈٹ اور پائیداری کے حصول کے لیے واضح مدت و اہداف تجویز کیے ہیں۔
مجوزہ اقدامات کا مقصد وزارت اطلاعات و نشریات اور قومی ورثہ و ثقافت ڈویژن میں موثر تنظیمی ڈھانچے کی تشکیل اور حجم میں کمی ہے۔کابینہ کمیٹی نے مجوزہ تجاویز پر وزارت اطلاعات و نشریات اور قومی ورثہ و ثقافت ڈویژن کے اعلیٰ حکام کے تاثرات سنے اور متعلقہ وزارتوں کے سینئر افسران نے مجوزہ سفارشات پر تفصیلی تبادلہ خیال کیا۔دونوں ڈویژنز سے متعلق کابینہ کمیٹی کی حتمی سفارشات جلد وفاقی کابینہ کو منظوری کے لیے پیش کی جائیں گی۔
Short Link: https://urdu.app.com.pk/urdu/?p=553909
