اسلام آباد۔24جولائی (اے پی پی):وفاقی وزیر قانون سینیٹر اعظم نذیر تارڑ نے کہا ہے کہ وفاقی حکومت گلگت بلتستان کے عوام کی مشکلات کو کم کرنے اور ہرممکن تعاون کے لیے پرعزم ہے، توانائی کے شعبے میں سرمایہ کاری کو راغب کرنے کے لیے گلگت بلتستان کے لوگوں کے لیے جی بی کے وسائل کی مکمل صلاحیت کو بہتر بنانے کے لیے پی پی آئی بی ایکٹ اور 2015 کی پاور پالیسی کو جی بی تک بڑھایا جائے گا۔
پیر کو ان خیالات کا اظہار انہوں نے گلگت بلتستان کے لیے پاور جنریشن پالیسی کو حتمی شکل دینے کے لیے اجلاس کی صدارت کرتے ہوئے کیا ۔ اجلاس میں تمام متعلقہ شراکت داروں نے شرکت کی ۔ اجلاس کے شرکاء میں وزیراعظم کے مشیر برائے امور کشمیر و گلگت بلتستان قمر زمان کائرہ، سیکرٹری پانی و بجلی گلگت بلتستان، سیکرٹری امور کشمیر، پاور ڈویژن کے نمائندے اور سیکرٹری قانون و انصاف ڈویژن شامل تھے۔
اجلاس کے شرکاء نے گلگت بلتستان میں بجلی کی طلب اور رسد کے اس فرق کو ختم کرنے کے لیے اپنے بصیرت افروز خیالات کا اظہار کیا جس کا گلگت بلتستان خطہ اس وقت سامنا کر رہا ہے۔ وزیر قانون نے جی بی کے عوام کی مشکلات کو کم کرنے کے لیے وفاقی حکومت کی جانب سے ہرممکن تعاون کے عزم کا اعادہ کیا۔ مزید برآں وفاقی حکومت بجلی کے بحران پر قابو پانے کے لیے جی بی حکومت کی مدد کرے گی۔
اجلاس میں اس بات پر تبادلہ خیال کیا گیا کہ توانائی کے شعبے میں سرمایہ کاری کو راغب کرنے اور جی بی کے لوگوں کے لیے گلگت بلتستان کے وسائل کی مکمل استعداد کو بہتر بنانے کے لیے پی پی آئی بی ایکٹ اور 2015 کی پاور پالیسی کو جی بی تک توسیع دی جائے گی جبکہ اس حوالے سے گلگت بلتستان حکومت سمری وزارت کو ارسال کرے گی۔
