وفاقی دارالحکومت میں ربیع الاول کے بابرکت مہینے میں مستحقین کے لیے مفت کھانے کی تقسیم جاری

اسلام آباد۔21ستمبر (اے پی پی):ربیع الاول کے مقدس مہینے کے دوران وفاقی دارالحکومت میں مختلف سماجی، فلاحی اور رضاکارانہ تنظیموں کی جانب سے خدمت خلق کے جذبے کے تحت مستحق اور نادار افراد میں مفت کھانے کی تقسیم کا سلسلہ جاری ہے۔ دارالحکومت کے مختلف علاقوں خصوصاً سیکٹرز G-7 سے I-10 تک مقامی مساجد، فلاحی تنظیمیں اور نوجوانوں کے رضاکار گروپ میلاد النبی ﷺ کی مناسبت سے انسان دوستی اور خدمت پر مبنی سرگرمیوں میں بڑھ چڑھ کر حصہ لے رہے ہیں۔

ان اقدامات میں سب سے نمایاں پہلو روزانہ کی بنیاد پر مفت کھانے کی تقسیم ہے، جو نبی کریم حضرت محمد ﷺ کی تعلیماتِ ہمدردی، سخاوت اور مساوات کا عملی مظہر ہے۔ مختلف سیکٹرز میں بائیکیا رائیڈرز، مزدور، اور کم آمدنی والے خاندانوں کی لمبی قطاریں دیکھی جا سکتی ہیں، جو عارضی اسٹالز پر لگے دسترخوان سے بریانی، دال، روٹی اور مشروبات سے مستفید ہو رہے ہیں۔ یہ کھانے بلا تفریق مذہب و ملت فراہم کیے جا رہے ہیں، جو اتحاد و انسانیت کا پیغام دیتے ہیں۔

ایک مقامی رضاکار اور یونیورسٹی طالبہ سارہ خان، جو نوجوانوں کی فلاحی تنظیم "ایکٹ آف کائنڈنیس” سے وابستہ ہیں، نے اے پی پی سے گفتگو کرتے ہوئے کہا کہ جب کسی بچے کے چہرے پر گرم اور غذائیت بخش کھانا پاتے ہی مسکراہٹ آتی ہے، تو وہ لمحہ دل کو چھو جاتا ہے۔ یہ مہینہ صرف جشن کا نہیں، بلکہ عمل کا ہے ، مدد کرنے، کھلانے، اور خدمت کا۔ سیکٹر G-9 میں کھانے کی تقسیم کے ایک منتظم طاہر نے بتایا کہ ربیع الاول ہمیں نبی کریم ﷺ کی زندگی اور اُن کی تعلیمات پر غور کرنے کا موقع فراہم کرتا ہے۔

یہ کھانے بانٹ کر ہم اُنہی کی سیرت پر عمل کر رہے ہیں، جو ہمیشہ غریبوں، یتیموں اور کمزور طبقے کے ساتھ ہمدردی کرتے تھے، کئی خاندان بھی ان کوششوں میں حصہ لے رہے ہیں۔ سیکٹر G-7 کی رہائشی، زہرا نے اے پی پی کو بتایا کہ وہ اور ان کی بیٹیاں ہر سال ربیع الاول کے دوران اضافی کھانا پکا کر عوامی مقامات پر تقسیم کرتی ہیں۔ انہوں نے بتایا کہ یہ ہمارا خاندانی معمول بن چکا ہے۔ ہم پورے مہینے کے لیے پہلے سے تیاری کرتے ہیں ، راشن خریدتے ہیں، کھانوں کی منصوبہ بندی کرتے ہیں اور ہمسایوں کے ساتھ تعاون کرتے ہیں۔

اسلام آباد کے چھوٹے بڑے کاروباری ادارے بھی اس کارِ خیر میں شریک ہو گئے ہیں۔ بعض نے راشن اور دیگر اشیاء عطیہ کی ہیں، جبکہ کچھ نے پورے دن کے کھانے کے انتظامات اسپانسر کیے ہیں۔ F-6 اور بھارہ کہو جیسے علاقوں میں چھوٹے ریسٹورنٹس نے مزدوروں اور دیہاڑی داروں کے لیے مفت کھانے کے پیکٹس فراہم کرنا شروع کر دیے ہیں۔ یہ تمام اقدامات رحم، سخاوت، اور سماجی انصاف کی اُن اقدار کا عکاس ہیں، جو نہ صرف ربیع الاول بلکہ دین اسلام کے بنیادی ستونوں میں شامل ہیں۔