اسلام آباد۔18جنوری (اے پی پی):وفاقی وزیر منصوبہ بندی ،ترقی اورخصوصی اقدامات احسن اقبال سے پاکستان میں برطانوی ہائی کمشنر جین میریٹ نے ہفتہ کو اسلام آباد میں سے ملاقات کی جس میں دونوں ممالک کے درمیان جاری اور مستقبل کےمنصوبوں میں تعاون پر تبادلہ خیال کیا گیا۔ملاقات کے دوران احسن اقبال نے وژن 2035 کے اقدام پرروشنی ڈالی جو پاکستان کی معاشی اور سماجی ترقی کے لیے اسٹریٹجک روڈ میپ کا کام کرتا ہے۔
انہوں نے پبلک پرائیویٹ پارٹنرشپ کے ذریعے بنیادی تعلیم سے محرومی کے خاتمے کی کوششوں، تعلیم، صحت اور انسانی وسائل میں استعداد بڑھانے کیلئے صوبائی تعاون اور اعلیٰ تعلیم کے لیے بجٹ میں نمایاں اضافے پر بھی روشنی ڈالی۔وفاقی وزیر نے کہا کہ حکومت اعلیٰ تعلیم کے نصاب کو جدید بنانے اور یونیورسٹی کے طلبا کو ہنر مند بنانے کیلئے پرعزم ہے۔
جین میریٹ نے وفاقی وزیر احسن اقبال کو بھی مبارکباد دی اور 5Es کے ٹارگٹڈ فریم ورک کے ذریعے اہم اقتصادی چیلنجوں سے نمٹنے کے لیے یوران پاکستان نیشنل اکنامک ٹرانسفارمیشن پلان کی تیاری کے لیے ان کی پوری ٹیم کی کوششوں کو سراہا۔وفاقی وزیر احسن اقبال نے ملاقات کے دوران بتایا کہ اقتصادی حکمت عملی کا مقصد پاکستان کی معیشت کی بحالی، پائیدار ترقی کو فروغ دینا اور جامع ترقی کو آگے بڑھانا ہے۔
انہوں نے ان پانچ اہم شعبوں برآمدات، ای پاکستان، ماحولیات ، موسمیاتی تبدیلی، توانائی، بنیادی ڈھانچہ، مساوات اور بااختیار بنانے کی اہمیت پر زور دیا جن کو حل کرنا حکمت عملی کا مقصد ہے،انہوں نے برآمدی نمو کو فروغ دینے، زرعی برآمدات کو بڑھانے، صنعتی ترقی کو فروغ دینے ، آئی ٹی، خدمات، کان کنی، افرادی قوت کی برآمد، بلیو اکانومی اور اختراع جیسے اہم شعبوں کو آگے بڑھانے میں مالیاتی شعبے کی اہمیت پر بھی زور دیا۔ملاقات کا اختتام دونوں فریقوں کی جانب سے مضبوط تعلقات کو فروغ دینے اور باہمی ترقی اور ترقی کے لیے مشترکہ کوششوں کے عزم کا اعادہ کرتے ہوئے ہوا۔
