اسلام آباد۔25اگست (اے پی پی):وفاقی وزیرداخلہ محسن نقوی سے ایرانی ہم منصب سکندر مومنی نے ٹیلیفونک رابطہ کیا۔ایرانی وزیر داخلہ نے پاکستان خصوصاً خیبرپختونخوا، گلگت میں طوفانی بارشوں و سیلاب سے قیمتی انسانی جانوں کے ضیاع پر دکھ اور تعزیت کا اظہار کیا اور جاں بحق افراد کے خاندانوں سے دلی ہمدردی کا اظہار کیا اور صبر جمیل کی دعا کی۔ ایرانی وزیر داخلہ نے پاکستانی ہم منصب محسن نقوی کو سیلاب متاثرین کی مدد کے لیے تعاون کی پیشکش کی۔
ایرانی وزیر داخلہ نے کہا کہ پاکستان ہمارا برادر ہمسایہ ملک ہے، آزمائش میں ہر طرح کی مدد کے لیے تیار ہیں۔پاکستان میں سیلاب کی تباہ کاریاں دیکھ کر بہت افسوس ہوا ہے۔ہم پاکستان کے عوام کے ساتھ شانہ بشانہ کھڑے ہیں۔ وزیرداخلہ محسن نقوی نے سیلاب زدگان کیلئے مدد کی پیشکش اور اظہار یکجہتی پر ایرانی ہم منصب کا شکریہ ادا کیا۔ وزیر داخلہ محسن نقوی نے کہا کہ ایران اور پاکستان کی خوشیاں اور غم سانجھے ہیں۔
موسمیاتی تبدیلیاں پاکستان میں تباہی کا پیش خیمہ بن رہی ہیں۔تاریخ میں پہلی بار پاکستان اس خطرناک موسمیاتی صورتحال سے گزر رہا ہے۔تمام ادارے سیلاب متاثرین کی مدد کے لیے فیلڈ میں ہیں اور متاثرین کی بحالی و ریلیف اولین ترجیح ہے۔
