دوحہ۔5مئی (اے پی پی):وفاقی وزیرداخلہ محسن نقوی نےقطر کی وزارت داخلہ میں قطر کے وزیر داخلہ خلفیہ بن حماد بن خلفیہ الثانی سے اہم ملاقات کی جس میں باہمی دلچسپی کے امور، دوطرفہ تعلقات اور مختلف شعبوں میں تعاون بڑھانے پر تبادلہ خیال کیا گیا۔
وزیرداخلہ محسن نقوی نے علاقائی صورتحال پر قطر کے وزیر داخلہ کو بریف کرتے ہوئے پاک بھارت کشیدگی کے تناظر میں اپنے قطری ہم منصب کو پاکستان کے اصولی موقف سے آگاہ کیا۔ انہوں نے کہا کہ پاکستان نے ہمیشہ جارحیت کی پالیسی کو مسترد کیا ہے۔ انہوں نے اس بات پر زور دیا کہ بھارت کو پہلگام واقعہ کی آزادانہ و غیر جانبدارانہ تحقیقات کی آفر کی ہے، دنیا کے سامنے واقعہ کی حقیقت آنی چاہئے کہ اس کا اصل ذمہ دار کون ہے۔
محسن نقوی نے کہا کہ پاکستان پر بے بنیاد اور غیر منطقی الزام لگانا دہشت گردی کے خلاف جنگ میں ہماری عظیم قربانیوں کو نظر انداز کرنے کے مترادف ہے۔ ملاقات میں جرائم پیشہ مافیا اور سائبر کرائمز کے خلاف مشترکہ اقدامات اٹھانے کی ضرورت پر زور دیا گیا۔ محسن نقوی نے کہا کہ منشیات کی روک تھام کیلئے قطر کے ساتھ باہمی رابطے مزید مستحکم کریں گے۔ ملاقات میں پولیس و قانون نافذ کرنے والے اداروں کے افسران کے لئے ٹریننگ کے ایکسچینج پروگرام پر بھی اتفاق کیا گیا۔
وزیر داخلہ محسن نقوی نے کہا کہ قطر کے ساتھ ہر سطح پر مضبوط تعلقات چاہتے ہیں۔ قطر کے وزیر داخلہ نے پاکستان کے ساتھ تعاون کو فروغ دینے کے لئے مزید اقدامات کی یقین دہانی کرائی۔ ملاقات میں مختلف شعبوں میں اشتراک کار بڑھانے کے لئے فوکل پرسن مقرر کرنے کا بھی فیصلہ کیا گیا۔ قطری وزیر داخلہ نے کہا کہ پاکستان سے دوطرفہ تعلقات کو خصوصی اہمیت دیتے ہیں، پاکستان کے ساتھ ہر شعبے میں تعاون بڑھانا چاہتے ہیں۔
قطر کے وزیر مملکت داخلہ شیخ عبدالعزیز بن فیصل بن محمد الثانی ،قطر میں پاکستان کے سفیر محمد عامر اور قطری وزارت داخلہ کے اعلی حکام بھی اس موقع پر موجود تھے۔ قبل ازیں وفاقی وزیرداخلہ محسن نقوی 2 روزہ سرکاری دورہ پر قطر پہنچے۔ قطر کے وزیر مملکت داخلہ شیخ عبدالعزیز بن فیصل بن محمد الثانی اور پاکستانی سفیر محمد عامر نے وزیر داخلہ محسن نقوی کا پرتپاک خیرمقدم کیا۔
قطر کے وزیر مملکت داخلہ شیخ عبدالعزیز بن فیصل بن محمد الثانی نے وزیرداخلہ محسن نقوی سے ملاقات کی۔ وزیر مملکت داخلہ قطر نے کہا کہ قطر آمد پر آپ کو دل کی گہرائیوں سے خوش آمدید کہتے ہیں، آپ کا دورہ دوطرفہ تعلقات کے فروغ کے لئے اہم ثابت ہو گا۔ محسن نقوی نے کہا کہ پاکستان قطر کے ساتھ تعلقات کو انتہائی اہمیت دیتا ہے۔
Short Link: https://urdu.app.com.pk/urdu/?p=592840
