اسلام آباد۔12اگست (اے پی پی):وفاقی وزیرداخلہ محسن نقوی نے بلوچستان کے ضلع ژوب کے علاقے سمبازہ میں فتنہ الہندوستان کے مزید 3 دہشت گردوں کو جہنم واصل کرنے پر سکیورٹی فورسز کو خراج تحسین پیش کیا ہے۔ اپنے بیان میں وزیر داخلہ نے گزشتہ چند روز میں مجموعی طور پر 50 بھارتی سپانسرڈ دہشت گردوں کو عبرتناک انجام تک پہنچانے پر سکیورٹی فورسز کی پیشہ وارانہ صلاحیتوں کو سراہا۔
وزیر داخلہ محسن نقوی نے کہا کہ فتنہ الہندوستان کے دہشت گردوں کے خلاف سکیورٹی فورسز کی کامیابیوں کو قوم قدر کی نگاہ سے دیکھتی ہے، سکیورٹی فورسز نے بلوچستان میں فتنہ پھیلانے میں ملوث بھارتی سپانسرڈ دہشت گردوں کو جہنم واصل کیا۔
انہوں نے کہا کہ سکیورٹی فورسز نے بلوچستان میں امن کو سبوتاژ کرنے کی گھنائونی سازش کو ناکام بنایا، فتنہ الہندوستان کے دہشت گردوں کے مذموم عزائم ناکام بنانے پر سکیورٹی فورسز کو سلیوٹ پیش کرتے ہیں، بھارتی سپانسرڈ دہشت گردوں کے مکمل خاتمے کےلئے پوری قوم سکیورٹی فورسز کے ساتھ کھڑی ہے۔
