اسلام آباد۔30مارچ (اے پی پی):وفاقی وزیرداخلہ محسن نقوی نے آزاد کشمیر کے علاقے باغ میں شہید میجر سعد بن زبیر کی رہائش گاہ جا کر شہید کے والد، والدہ،بھائی اور دیگر اہل خانہ سے ملاقات کی۔ انہوں نے شہید کے لئے فاتحہ خوانی کی اور ان کہ بہادری کو خراج عقیدت پیش کیا۔ وفاقی وزیرداخلہ نے شہید میجر سعد کے والد، والدہ اور بھائی کو دلاسہ دیا اور ان کے بلند حوصلے کو سراہتے ہوئے کہا کہ قوم کو شہید میجر سعد کی لازوال قربانی پر ناز ہے،بہادر سپوت قوم کا ناقابل فراموش سرمایہ ہے۔
وزیر داخلہ نے کہا کہ شہید میجر سعد بن زبیر کے بلند حوصلہ والدین کو دیکھ کر ہمارا عزم مزید مضبوط ہوا ہے،شہید کے والدین کا جذبہ قابل ستائش اور قابل فخر ہے ۔ وزیرداخلہ محسن نقوی نے شہید میجر سعد بن زبیر کے ایصال ثواب کیلئے فاتحہ خوانی کی اور سوگوار خاندان کے صبر جمیل کی دعا کی۔ وزیر داخلہ محسن نقوی نے کہا کہ شہید میجر سعد بن زبیر نے شہادت کا عظیم رتبہ پایا۔
قوم کو شہید میجر سعد بن زبیر کی لازوال قربانی پر ناز ہے۔میجر سعد بن زبیر جیسے بہادر سپوت قوم کا ناقابل فراموش سرمایہ ہیں۔ وفاقی وزیرداخلہ نے کہا کہ ہمارا ایمان ہے کہ شہید ہمیشہ زندہ رہتے ہیں اورشہید میجر سعد بن زبیر ہمیشہ ہمارے دلوں میں زندہ رہیں گے۔میجر سعد بن زبیر چند روز قبل ژوب کے علاقے سمبازہ میں شہید ہوئے تھے۔
Short Link: https://urdu.app.com.pk/urdu/?p=577414
