اسلام آباد۔28مارچ (اے پی پی):وفاقی وزیرقانون،انصاف و انسانی حقوق اعظم نذیر تارڑ سے آسٹریلین ہائی کمشنر نیل ہاکنز نے ملاقات کی۔ ملاقات میں دوطرفہ تعلقات، باہمی دلچسپی کے امور اور سکیورٹی صورتحال پر تبادلہ خیال کیا گیا۔ جمعہ کو وزارت انسانی حقوق سے جاری پریس ریلیز کے مطابق ملاقات کے دوران ہائی کمشنر نیل ہاکنز نے حالیہ سکیورٹی صورتحال پر گفتگو کرتے ہوئے جعفر ایکسپریس واقعہ پر افسوس کا اظہار کیا۔
انہوں نے بتایا کہ آسٹریلوی حکومت بلوچستان میں مائننگ کے شعبے میں دلچسپی رکھتی ہے اور اس حوالے سے منعقد ہونے والی منرلز کانفرنس میں شرکت کی خواہاں ہے۔ اس موقع پر وزیرِ قانون نے یقین دلایا کہ وفاقی حکومت اس شعبے میں سرمایہ کاری اور ترقی کے لئے بھرپور اقدامات کر رہی ہے جبکہ معیشت کو مستحکم بنانا حکومت کی اولین ترجیح ہے۔ملاقات میں انسانی حقوق اور ان کے تحفظ کے حوالے سے بھی تفصیلی تبادلہ خیال ہوا۔
آسٹریلین ہائی کمشنر نے وزیرِ قانون کی بطور وزیرِ انسانی حقوق کی گئی کاوشوں کو سراہا اور قومی کمیشن برائے انسانی حقوق کے حوالے سے پیشرفت کا خیر مقدم کیا۔مزید برآں ملاقات میں قانونی معاملات پر بھی بات چیت کی گئی جس میں دوطرفہ تعاون کے امکانات اور عدالتی نظام کے حوالے سے اقدامات پر غور کیا گیا۔
Short Link: https://urdu.app.com.pk/urdu/?p=577006
