وفاقی وزیرپیر سیّد صدر الدین شاہ راشدی سے یورپی یونین کے سفیر جین فرینکوئس کاٹین کی ملاقات ، پاکستانی تارکین وطن کی بحالی سے متعلق امور پر تبادلہ خیال کیا گیا
اسلام آباد ۔ 27 ستمبر (اے پی پی)وفاقی وزیر سمندر پار پاکستانیز و ترقی انسانی وسائل پیر سیّد صدر الدین شاہ راشدی سے یورپی یونین کے پاکستان میں سفیر جین فرینکوئس کاٹین نے ملاقات کی اور پاکستانی تارکین وطن کی بحالی سے متعلق امور پر تبادلہ خیال کیا۔ ملاقات کے دوران قانونی ذرائع سے یورپ جانے والے تارکین وطن اور ان کو فراہم کی جانے والی سہولیات زیر گفتگو آئیں۔ وفاقی وزیر نے کہا کہ پاکستان اور یورپی یونین کے مابین گہرے قریبی تعلقات پائے جاتے ہیں۔ انہوں نے پاکستانی تارکین وطن کے حوالہ سے تکینکی معاونت پر یورپی یونین کے کردار کو سراہا۔ یورپی یونین کے سفیر نے بتایا کہ واپس آنے والے پاکستانی ورکرز کی بحالی کےلئے اکنامک افیئر ڈویژن کے ساتھ ایک معاہدے پر گفت و شنید جاری ہے۔ اس سلسلہ میں وزارت بھی اپنا کردار ادا کرے۔ وفاقی وزیر نے یورپی یونین کے سفیر کو پاکستانی تارکین وطن کی بحالی کے سلسلے میں وزارت سمندر پارپاکستانیز وترقی انسانی وسائل کی بھر پور معاونت کا یقین دلایا۔
