پشاور۔21جولائی (اے پی پی):وفاقی وزیر اطلاعات، نشریات، قومی ورثہ و ثقافت عطاءاللہ تارڑ اتوار کو یہاں پرنسپل انفارمیشن آفیسر (پی آئی او) مبشر حسن کے والد کے انتقال پر تعزیت کے لئے ان کے گھر گئے۔
اس موقع پر مسلم لیگ ( ن )کے رہنما اقبال ظفر جھگڑا اور اختیار ولی خان بھی ان کے ہمراہ موجود تھے۔ وفاقی وزیر اطلاعات نے پی آئی او مبشر حسن اور دیگر اہل خانہ سے دلی تعزیت اور ہمدردی کا اظہار کیا اور مرحوم کے ایصال ثواب کے لئے فاتحہ خوانی کی۔
وفاقی وزیر نے کہا کہ والد ایک عظیم نعمت ہے، ان کا انتقال کسی بڑے سانحہ سے کم نہیں، مرحوم کے انتقال سے پیدا ہونے والا خلا کبھی پرنہیں ہو سکے گا۔ انہوں نے کہا کہ دکھ کی اس گھڑی میں اہل خانہ کے غم میں برابر کے شریک ہیں۔ وفاقی وزیر نے دعا کی کہ اللہ رب العزت مرحوم کو غریق رحمت کرے، ان کے درجات بلند اور پسماندگان کو صبر جمیل عطا فرمائے۔ آمین
Short Link: https://urdu.app.com.pk/urdu/?p=486141
