اسلام آباد۔3دسمبر (اے پی پی):پاکستان مسلم لیگ (ن) شعبہ خواتین کی سابق صدر، سینئر پارلیمنٹیرین بیگم نجمہ حمید 78 برس کی عمر میں وفات پاگئیں۔ بیگم نجمہ حمید گزشتہ کچھ عرصے سے علیل تھیں۔ ان کا انتقال جمعہ کی شب راولپنڈی کے ہولی فیملی ہسپتال میں ہوا۔ بیگم نجمہ حمید پاکستان مسلم لیگ کی رہنما رکن قومی اسمبلی طاہرہ اورنگزیب کی بڑی بہن اور وزیر اطلاعات مریم اورنگزیب کی خالہ تھیں۔
بیگم نجمہ حمید پاکستان مسلم لیگ (ن) کی مرکزی رہنما اور راولپنڈی میں پارٹی کی پہچان تھیں۔ وہ مسلم لیگ (ن) شعبہ خواتین کی صدر بھی رہیں۔ اس کے علاوہ وہ دو بار سینیٹ آف پاکستان کی رکن بھی رہیں۔ بیگم نجمہ حمید پاکستان مسلم لیگ (ن) کے قائد محمد نوازشریف اور ان کی اہلیہ کے انتہائی قریب تھیں۔ بیگم کلثوم کی سیاسی جدوجہد کے موقع پر بیگم نجمہ حمید نے ان کے ہمراہ بھرپور سیاسی جدوجہد میں حصہ لیا۔ وہ اس سیاسی تحریک کے نمایاں اور سرفہرست رہنمائوں میں شامل تھیں۔
بیگم نجمہ حمید 18 مارچ 1944ءکو ملتان میں پیدا ہوئیں۔ وہ پاکستان کے پہلے وزیراعظم لیاقت علی خان کی اہلیہ بیگم رعنا لیاقت علی خان اور بیگم فیروز خان نون کے ساتھ مسلم لیگ کے لئے خدمات انجام دیتی رہیں۔ انہوں نے تمام عمر پاکستان مسلم لیگ کے ساتھ بسر کی۔
ان کی سیٹلائٹ ٹائون راولپنڈی میں واقع رہائش گاہ پر بیگم کلثوم نظربند رہیں۔ بیگم نجمہ حمید کا گھر ہمیشہ سیاسی سرگرمیوں کا مرکز رہا۔ وہ ایک بہادر اور ذہین سیاسی رہنما کے طور پر جانی جاتی تھیں۔ مرحومہ نے سوگواران میں تین بیٹے چھوڑے ہیں۔ بیگم نجمہ کی نماز جنازہ (آج) ہفتہ کو راولپنڈی میں ادا کی جائے گی۔
