دبئی ۔ 28 جنوری (اے پی پی) وفاقی وزیر اطلاعات و نشریات چوہدری فواد حسین نے کہا ہے کہ وزیراعظم عمران خان کی قیادت میں پاکستان تابناک مستقبل کی طرف بڑھ رہا ہے، پاکستان، مشرق وسطیٰ میں امن کے فروغ میں اہم شراکت دار ہے، پاکستان اپنا عالمی تشخص دوبارہ حاصل کررہا ہے، پی ایس ایل۔4 کے میچوں میں نیشنل سٹیڈیم کراچی اور قذافی سٹیڈیم لاہور کی جھلک نظر آئے گی۔ وفاقی وزیر اطلاعات و نشریات گزشتہ شب پی ایس ایل۔4 کے سلسلہ میں یہاں منعقدہ ”میدان سجانا ہے پاکستان کی شان بڑھاناہے” کی افتتاحی تقریب سے خطاب کررہے تھے۔ انہوں نے توقع ظاہر کی ہے کہ پی ایس ایل۔4 سلسلہ کا یہ آخری کھیل ہوگا جو پاکستان سے باہر کھیلا جا رہا ہے، ہماری دعا، خواہش اور کوشش ہے کہ دبئی میں یہ آخری پی ایس ایل ہو۔ انہوں نے اس امید کا اظہار کیا کہ پی ایس ایل۔4 کے میچوں میں نیشنل سٹیڈیم کراچی اور قذافی سٹیڈیم لاہور کی جھلک نظر آئے گی۔ چوہدری فواد حسین نے کہا کہ وزیراعظم عمران خان کی قیادت میں پاکستان تابناک مستقبل کی طرف بڑھ رہا ہے جنہوں نے چھ ماہ میں پاکستان کی خارجہ پالیسی کا پانسہ پلٹ کر رکھ دیا۔ انہوں نے کہا کہ گزشتہ چند سالوں میں مشرق وسطیٰ میں ہمارا کردار ختم ہوگیا تھا لیکن آج پاکستان اپنا عالمی تشخص دوبارہ حاصل کررہا ہے۔ انہوں نے کہا کہ پاکستان، مشرق وسطیٰ میں امن کے فروغ میں اہم شراکت دار ہے۔ وزیر اطلاعات نے کہا کہ ہم 1980ء کی دہائی سے ایک تنازع میں رہے لیکن اب پاکستان اس تنازع سے باہر نکل آیا ہے اور اپنا مقام بنالیا ہے ۔ وزیر اطلاعات نے کہا کہ پاکستان نے دہشت گردوں اورانتہا پسندوں کے خلاف ایکشن لیا جس کی ماضی میں مثال نہیں ملتی۔
