وفاقی وزیر اطلاعات چوہدری فواد حسین کا آصف علی زرداری کے خطاب پر رد عمل

اسلام آباد۔15 دسمبر (اے پی پی)وفاقی وزیر اطلاعات و نشریات چوہدری فواد حسین نے کہا ہے کہ آصف زرداری صاحب حکومت کے اولین سودن گننے کی بجائے اپنی سیاست کے آخری دن گننے پر توجہ دیں،ہزاروں دن حکومت کر کے ملک و قوم کا بیڑہ غرق کرنے والے ہمارے سو دن گن رہے ہیں۔ہفتہ کو پی پی پی کے شریک چیئرمین آصف علی زرداری کے جلسہ عام سے خطاب پر رد عمل دیتے ہوئے انہوں نے کہا کہ کہا کہ آصف زرداری صاحب حکومت کے اولین سودن گننے کی بجائے اپنی سیاست کے آخری دن گننے پر توجہ دیں،جتنے مرضی فلسفے بیان کریں ساری قوم جانتی ہے پیسہ کس نے لوٹا۔چوہدری فواد حسین نے کہا کہ جو کام ضیاءالحق نہ کرسکا، وہ کام زرداری نے کیا، پیپلز پارٹی کو قومی جماعت سے ایک علاقائی جماعت بنا دیا۔وفاقی وزیر نے کہا کہ قوم پوچھتی ہے کہ آپ کو قوم کا پیسہ لوٹنے کا کس نے حق دیا ہے؟انہوں نے کہا کہ آپ چاہتے ہیں کہ اداروں کی سربراہی بھی اپنے چمچوں کڑچھوں میں بانٹ دیں؟پاکستان تحریک انصاف ایسا ہرگز نہیں ہونے دے گی۔ وزیر اطلاعات نے کہا کہ جب ان سے حساب مانگو تو ان کو جمہوریت یاد آ جاتی ہے،گاجریں نہ کھائی ہوتیں تو آج اتنا پیٹ میں درد بھی نہ ہوتا۔وفاقی وزیر نے کہا کہ ہزاروں دن حکومت کر کے ملک و قوم کا بیڑہ غرق کرنے والے ہمارے سو دن گن رہے ہیں۔انہوں نے کہا کہا کہ آصف زرداری نے پہلے بھی ایک بیان دیا تھا ،پھر تین سال دبئی میں سیروتفریح کرنی پڑی۔