اسلام آباد۔24اکتوبر (اے پی پی):وفاقی وزیر اطلاعات و نشریات مریم اورنگزیب نے سینئر صحافی اور اینکر پرسن ارشد شریف کی کینیا میں افسوسناک موت پر ارشد شریف کی والدہ اور پاکستان میں کینیا کے سفیر کو ٹیلیفون کیا۔ ارشد شریف کی والدہ سے تعزیت کا اظہار کرتے ہوئے انہوں نے کہا کہ حکومت پاکستان ارشد شریف کی موت کے حوالے سے کینیا کی حکومت اور متعلقہ حکام سے رابطے میں ہے۔
انہوں نے ارشد شریف کی والدہ کو ان کے بیٹے کی موت پر اب تک ہونے والی پیش رفت اور حاصل ہونے والی معلومات سے آگاہ کیا۔ انہوں نے کہا کہ ارشد شریف کی موت پر بہت دکھ ہے، اہل خانہ کے غم میں برابر شریک ہیں۔
ارشد شریف کی موت کی وجوہات کا پتہ چلانے کی کوششیں جاری ہیں۔ انہوں نے کہا کہ کینیا کی حکومت نے سرکاری طور پر ارشد شریف کی موت کے بارے میں اب تک کچھ نہیں بتایا، جیسے ہی کینیا کی حکومت ہمیں آگاہ کرے گی، ہم تفصیلات سے ارشد شریف کے اہل خانہ اور عوام کو آگاہ کریں گے۔
انہوں نے کہا کہ حکومت پاکستان کینیا کی حکومت اور متعلقہ حکام سے رابطے میں ہیں۔ انہوں نے کہا کہ پاکستانی میڈیا پر ارشد شریف سے متعلق جاری قیاس آرائیاں افسوسناک ہیں، کینیا میں پاکستان کی سفیر پولیس حکام سے رابطے میں ہیں اور آئی جی کے دفتر جا رہی ہیں۔ اس کے علاوہ پاکستان میں کینیا کے سفیر سے بھی رابطہ ہوا ہے جنہوں نے مکمل تعاون کا یقین دلایا ہے۔ پاکستان میں کینیا کے سفیر اپنی حکومت سے معلومات حاصل کرکے ہمیں آگاہ کریں گے۔
وزارت داخلہ کینیا کی سکیورٹی ایجنسیز سے رابطے میں ہیں، حقائق عوام کے سامنے لائیں گے۔ انہوں نے کہا کہ مصدقہ حقائق سامنے آنے تک قیاس آرائیوں سے گریز کیا جائے۔ ارشد شریف کی موت کے حوالے سے تمام حقائق تک پہنچیں گے۔ وفاقی وزیر اطلاعات نے دعا کی کہ اللہ تعالیٰ مرحوم کو جنت الفردوس میں اعلی مقام اور اہل خانہ کو صبر جمیل عطا فرمائے۔
Short Link: https://urdu.app.com.pk/urdu/?p=333915
