اسلام آباد۔27اگست (اے پی پی):وفاقی وزیر برائے امور کشمیر و گلگت بلتستان انجینئر امیر مقام نے بدھ کو گلگت کے پروانشل ایمرجنسی سنٹر کا دورہ کیا جہاں پر چیف سیکرٹری ابرار احمد مرزا اور ڈائریکٹر جنرل جی بی ڈیزاسٹر مینجمنٹ اتھارٹی نے ان کا استقبال کیا،یہ دورہ حالیہ سیلابی صورتحال کے تناظر میں کیا گیا۔
سیکرٹری داخلہ علی اصغر اور ڈی جی ڈیزاسٹر مینجمنٹ اتھارٹی نے وفاقی وزیر کو متاثرہ علاقوں اور جاری امدادی کارروائیوں کے حوالے سے بریفنگ دی جس میں چیف سیکرٹری ابرار احمد مرزا سمیت دیگر اعلیٰ سرکاری افسران نے بھی شرکت کی اور سیلاب سے پیدا ہونے والی صورتحال پر تفصیلی رپورٹس پیش کیں۔
اس موقع پر فیڈرل سیکرٹری برائے امور کشمیر و گلگت بلتستان ظفر حسن، سابق وزیر اعلیٰ و صوبائی صدر مسلم لیگ (ن) گلگت بلتستان حفیظ الرحمٰن ،صوبائی وزیر انجینئر محمد انور اور صوبائی وزیر غلام محمد سمیت دیگر اعلیٰ حکام بھی موجود تھے۔وفاقی وزیر نے انتظامیہ کی کاوشوں کو سراہتے ہوئے وفاقی حکومت کی جانب سے مکمل تعاون کی یقین دہانی کرائی۔
انہوں نے ہدایت کی کہ متاثرہ علاقوں میں فوری ریلیف کی فراہمی یقینی بنائی جائے۔قبل ازیں وفاقی وزیر انجینئر امیر مقام تین روزہ سرکاری دورے پر گلگت بلتستان پہنچے، وہ سیلاب سے متاثرہ علاقوں کا جائزہ لیں گے۔ امیر مقام متاثرینِ سیلاب سے ملاقات کریں گے اور لوگوں کےمسائل سنیں گے۔
