اسلام آباد۔19دسمبر (اے پی پی):وفاقی وزیر بحری امور قیصر احمد شیخ سے ترکیہ کے پاکستان میں سفیر عرفان نذیر اوگلو نے ملاقات کی، جس میں دوطرفہ تجارت اور بحری امور میں تعاون کے فروغ کے امکانات پر گفتگو کی گئی
۔جمعرات کے روز وزارت بحری امور کی جانب سے جاری ایک بیان کے مطابق اس ملاقات میں ترکیہ کی تھرڈ سیکریٹری برائے پاکستان صالحہ نور پیکدمیر اور سیکریٹری برائے بحری امور سید ظفر علی شاہ بھی موجود تھے۔ملاقات کے دوران دونوں ممالک کے درمیان تجارتی تعلقات کو بہتر بنانے کی خواہش کا اظہار کیا گیا اور مؤثر ٹرانسپورٹ حل کی ضرورت پر زور دیا گیا۔
سفیر نذیراوگلو نے بتایا کہ ترکیہ اور پاکستان کے مابین موجودہ تجارتی حجم ایک ارب ڈالر سے کم ہےجو کہ وزیرِ اعظم پاکستان کی جانب سے مقرر کردہ 5 ارب ڈالر کے ہدف سے بہت کم ہے۔ انہوں نے ٹرانسپورٹ کے مسائل خاص طور پر ایران کے بارڈر سے متعلق رکاوٹوں کو اہم چیلنج قرار دیتے ہوئے بحری ٹرانسپورٹ کو سب سے مؤثر حل کے طور پر تجویز کیا۔
وفاقی وزیر نے ترک سفیر کو یقین دلایا کہ پاکستان ان مسائل کے حل میں مکمل تعاون فراہم کرے گا۔ انہوں نے بحری نقل و حمل کی حکمت عملی کے تحت تجارت کے حجم کو بڑھانے کی اہمیت کو اجاگر کیا اور ترک سرمایہ کاروں کو پاکستان کے بحری شعبے میں مواقع تلاش کرنے کی دعوت دی۔ اس دوران کراچی پورٹ ٹرسٹ اور پورٹ قاسم کے صنعتی زون کا خصوصی ذکر کیا گیا، جہاں 400 صنعتی یونٹس موجود ہیں اور انہیں 800 یونٹس تک بڑھانے کی منصوبہ بندی کی جا رہی ہے۔وفاقی وزیر نے مشترکہ منصوبوں کے امکانات پر روشنی ڈالتے ہوئے کہا کہ پاکستان ترکیہ سے کیمیکل درآمد کر رہا ہے اور اس شعبے میں وسیع تر تعاون کے مواقع موجود ہیں۔
مزید انہوں نے پاکستان کی جانب سے جدید شپ یارڈز کے حصول کی منصوبہ بندی کا ذکر کیا اور ترکیہ کو اس حوالے سے ایک مضبوط امیدوار قرار دیا۔سیکریٹری برائے بحری امور سید ظفر علی شاہ نے 2022 کے سیلاب کے دوران ترکیہ کے مثبت کردار کو سراہتے ہوئے دونوں ممالک کے درمیان خیرسگالی کے جذبات کو اجاگر کیا۔ انہوں نے بحری تعاون کی صلاحیت پر بھی زور دیا جو دوطرفہ تجارت کو بہتر بنانے میں اہم کردار ادا کر سکتی ہے۔ملاقات کے اختتام پر دونوں فریقین نے اقتصادی تعلقات کو گہرا کرنے سرمایہ کاری کو فروغ دینے اور بحری نقل و حمل کے ذریعے نئے مواقع تلاش کرنے کے عزم کا اعادہ کیا۔ اس تعاون سے نہ صرف دونوں ممالک کے درمیان تجارتی اہداف حاصل کرنے میں مدد ملے گی بلکہ دیرینہ برادرانہ تعلقات کو مزید تقویت ملے گی۔
Short Link: https://urdu.app.com.pk/urdu/?p=537729
