اسلام آباد۔16اپریل (اے پی پی):وفاقی وزیر برائے انسانی حقوق سینیٹر اعظم نذیر تارڑ سےبرطانیہ کی وزارت ہائوسنگ، کمیونٹیز و مقامی حکومت کے پارلیمانی انڈر سیکرٹری آف سٹیٹ لارڈ واجد خان نے ملاقات کی۔ بدھ کو وزارت انسانی حقوق سے جاری بیان کے مطابق لارڈ واجد خان نے پاکستان اور برطانیہ کے درمیان دو طرفہ تعلقات کو مزید مضبوط بنانے کی برطانیہ کی خواہش کا اظہار کرتے ہوئے مختلف شعبوں میں پائیدار اور بامعنی شراکت داری قائم کرنے کی اہمیت پر زور دیا۔
انہوں نے اوورسیز کنونشن جیسے اقدامات کو سراہا جو بیرون ملک پاکستانی کمیونٹی سے رابطے بڑھانے اور باہمی دلچسپی کے شعبوں میں تعاون کے فروغ کا ایک اہم پلیٹ فارم ہیں۔وفاقی وزیر سینیٹر اعظم نذیر تارڑ نے اس خیر سگالی کے جذبے کا خیرمقدم کیا اور برطانیہ کے ساتھ تاریخی اور کثیر الجہتی تعلقات کو مزید آگے بڑھانے کے عزم کا اعادہ کیا۔ انہوں نے کہا کہ پاکستان انسانی حقوق، قانونی اصلاحات اور جامع ترقی کے شعبوں میں تعاون کو مزید گہرا کرنے کا خواہاں ہے۔ملاقات کے دوران وزیر قانون نے پاکستان میں آئینی حقوق اور سماجی انصاف کے فروغ کے لیے حکومتی اقدامات سے آگاہ کیا، جن میں آئین کے آرٹیکلز 20 تا 36 کے تحت تمام کمیونٹیز کے تحفظ کے لیے اقدامات شامل ہیں۔
انہوں نے حالیہ قانون سازی پر روشنی ڈالی جو اقلیتوں کے حقوق کے تحفظ اور ایک زیادہ جامع معاشرہ قائم کرنے کے لیے حکومت کے عزم کی عکاسی کرتی ہے۔ وزیر نے بین المذاہب ہم آہنگی کو فروغ دینے، برابری کی شہریت کو یقینی بنانے اور امتیازی سلوک کے واقعات سے نمٹنے کے لئے جاری اقدامات کا بھی ذکر کیا۔ اقلیتوں کے لیے قومی کمیشن (این سی ایم) کے قیام کو ایک ایسا اہم ادارہ قرار دیا گیا جو شمولیت اور حقوق پر مبنی حکمرانی کے فروغ میں کلیدی کردار ادا کر رہا ہے۔
دونوں فریقین نے پاکستان کے سیاسی منظرنامے اور قانونی اصلاحات کے ایجنڈے پر بھی تبادلہ خیال کیا اور مسلسل رابطے اور باہمی سیکھنے کی اہمیت پر زور دیا۔ دونوں نے جمہوری اصولوں اور انسانی وقار کے احترام پر مبنی مشترکہ اہداف کے حصول کے لئے مکالمے اور تعاون کے عزم کا اعادہ کیا۔وفاقی وزیر نے لارڈ واجد خان کے دورہ پاکستان کو سراہا اور دونوں ممالک کے مابین پل کا کردار ادا کرنے پر برطانوی۔پاکستانی کمیونٹی کے مثبت کردار کو تسلیم کیا۔ ملاقات کا اختتام اس مشترکہ عزم کے ساتھ ہوا کہ ادارہ جاتی روابط اور عوامی سطح پر تبادلوں کو مزید فروغ دیا جائے گا تاکہ دوستی اور باہمی احترام کے جذبے کی حقیقی عکاسی ہو سکے۔
Short Link: https://urdu.app.com.pk/urdu/?p=582833
