اسلام آباد۔24اپریل (اے پی پی):وفاقی وزیر برائے ریلویز محمد حنیف عباسی نے پشاور ڈویژنل سپرنٹنڈنٹ (ڈی ایس) آفس کا دورہ کیا، انھیں اس موقع پر تفصیلی بریفنگ دی گئی۔ پاکستان ریلویز کی اراضی کا جائزہ لیا گیا، قبضہ شدہ اراضی اور بازیابی کی صورتحال پر تفصیلی بات چیت کی گئی۔ محمد حنیف عباسی نے کہا کہ ریلوے اراضی کے لیزنگ کے روایتی طریقوں کو تبدیل کرنا ہے، شیئرنگ ماڈل اپنانے کا ارادہ رکھتے ہیں، کسی بھی قبضہ مافیا کو ایک انچ بھی نہیں دیں گے۔
وفاقی وزیرنے کہا کہ ہم نے وزیراعلیٰ پنجاب مریم نواز کے ماڈل کو اپنایا ہے۔ انہوں نے پشاور ریلوے سٹیشن پر صفائی اور محفوظ خوراک کے معیار کا تفصیلی معائنہ کیا۔ وفاقی وزیر نے صفائی اور صاف خوراک کے معیار کو سراہا۔
انہوں نے کہا کہ مسافروں کو صاف پانی اور صحت مند کھانا فراہم کرنا ہماری اولین ترجیح ہے۔حنیف عباسی نے ٹرینوں کی بر وقت آمدورفت کو اولین ترجیح قرار دیتے ہوئے کہا کہ ہم قواعد و ضوابط پر سختی سے عمل کریں گے۔ پاکستان ریلوے کو جدید بنانا ہے اور مسافروں کے لیے پہلی ترجیحی سفری ذریعہ بنانے کے عزم رکھتے ہیں۔وفاقی وزیر نے ریلوے کے عمومی افعال اور ٹرینوں کی کارکردگی پر بھی بریفنگ لی۔
Short Link: https://urdu.app.com.pk/urdu/?p=587296
