اسلام آباد۔31مئی (اے پی پی):وفاقی وزیر برائے منصوبہ بندی ترقی واصلاحات وخصوصی ونیشنل کمانڈ اینڈ آ پریشن سنٹر کے سربراہ اسدعمر نے کہا ہے کہ رمضان کے آخری عشرے میں کورونا کا پھیلاؤ کم ہوا،دسمبر 2021 تک 7 کروڑ افراد کو ویکسین لگانے کا ہدف ہے
70 لاکھ سے زائد ویکسی نیشن کی جاچکی ہے، سندھ میں کورونا کا پھیلاؤ زیادہ ہے۔
ان خیالات کا اظہار انہوں نے پیر کو میڈیا بریفنگ دیتے ہوئے کیا۔انہوں نے کہا کہ اللہ تعالیٰ کا شکر ہے بھارت جیسی صورتحال کا سامنا نہیں کرنا پڑا، کورونا ویکسی نیشن مراکز کی تعداد میں اضافہ کیا جا رہا ہے، 20 لاکھ اساتذہ کو 10جون تک ویکسین لگائی جائے گی،جون میں ایک کروڑ سے زائد ویکسین آئے گی، اسد عمر نے کہا کہ جون اور جولائی میں 2 کروڑ ویکسین پاکستان میں میسر ہوگی،کورونا کے پھیلاؤ کی شرح 10سے 4 فیصد پر آگئی ہے۔انہوں نے کہا کہ صدر مملکت رواں ہفتےعلمائے کرام سے ملاقات کریں گے،علمائے کرام کے ذریعے لوگوں کو ویکسین لگوانے کا کہا جائے گا۔
