اسلام آباد۔16مارچ (اے پی پی):وفاقی وزیر برائے منصوبہ بندی ،ترقی و خصوصی اقدامات پروفیسر احسن اقبال نے ہائر ایجوکیشن کمیشن (ایچ ای سی) کو ہدایت کی ہے کہ وہ جامعات کے لئے کارکردگی کے انتظام کے جدید نظام کے لئے ایک مکمل فریم ورک تیار کرے تاکہ اعلیٰ تعلیم کے شعبے کی حوصلہ افزائی کی جا سکے۔وفاقی وزیر نے یہ ہدایات جمعرات کو پبلک سیکٹر یونیورسٹیوں کی کارکردگی کے آڈٹ کے فریم ورک کی پیشرفت کا جائزہ لینے کے لئے ایک اجلاس کی صدارت کرتے ہوئے دیں۔
اجلاس میں ایچ ای سی کے حکام، ممبر سائنس اینڈ ٹیکنالوجی، پلاننگ کمیشن اور دیگر اسٹیک ہولڈرز نے شرکت کی۔وفاقی وزیر منصوبہ بندی نے ایچ ای سی کو ہدایت کی کہ وہ اعلیٰ تعلیم کے شعبے میں سات پیرامیٹرز کی روشنی میں تعلیمی معیار کو یقینی بنائے جن میں(تدریس اور سیکھنے) اور نصاب، تحقیق، اختراع، اور انٹرپرینیورشپ، اکیڈمیکا،انڈسٹری لنکیج، ٹیکنالوجی انفراسٹرکچر اور اہلیت، کارپوریٹ گورننس ، آڈٹ اور فنانس، کمیونٹی سروس شامل ہیں۔
جبکہ ہر معیار کے لیے کلیدی پرفارمنس انڈیکیٹرز کے پی آئیز کی ترقی ان کا ایک اور اہم نکتہ تھا۔اس موقع پر خطاب کرتے ہوئے وفاقی وزیر نے اس بات پر زور دیا کہ ادارہ جاتی اقدامات کو اپنی تدریس اور سیکھنے کے طریقوں میں ترمیم کرکے موثر کمیونٹی سروس اور شمولیت کو فروغ دینے پر توجہ مرکوز کی جانی چاہئے تاکہ طلباء اور اساتذہ فوری مقامی اور عالمی خدشات اور مشکلات کو دور کرنے میں مدد کرنے میں حصہ لے سکیں۔
وفاقی وزیر نے کہا کہ یونیورسٹیوں کو طلباء کو نرم مہارتوں جیسے مواصلات، ٹیم ورک، قیادت، اور مسائل کو حل کرنے کے مواقع فراہم کرنے چاہئیں جبکہ کام کی جگہ پر کامیابی کے لیے نرم مہارتیں ضروری ہیں اور گریجویٹوں کو ممکنہ آجروں کے سامنے کھڑے ہونے میں مدد کر سکتی ہیں۔مزید برآں جامعات کو تعاون اور علم کے تبادلے کو فروغ دینے کے لیے صنعتی شراکت داروں کے ساتھ شراکت داری قائم کرنی چاہئے۔
انہوں نے مزید کہا کہ یونیورسٹیوں کو مالیاتی انتظام کے صحیح طریقے قائم کرنے چاہئیں جو مالی وسائل کے ذمہ دارانہ استعمال کو یقینی بنائیں، ہمیں اپنی یونیورسٹیوں کو دنیا بھر کے اعلیٰ اداروں تک پہنچنے میں مدد کرنی چاہئے ۔ایک اور اجلاس کی صدارت کرتے ہوے وفاقی وزیر نے ایچ ای سی کے زیر انتظام آئی ٹی ٹریننگ اور سرٹیفیکیشن پروگراموں کی پیشرفت کا جائزہ لیا۔ اجلاس کا مقصد ایک جامع ڈھانچہ تیار کرکے سرٹیفیکیشن پروگراموں کو بہتر بنانا ہے۔
