اسلام آباد۔10مارچ (اے پی پی):وفاقی وزیر پیٹرولیم علی پرویز ملک نے اپنے عہدے کا چارج سنبھال لیا۔پیر کو ترجمان پیٹرولیم ڈویژن کے مطابق وزارت پیٹرولیم آمد پر سیکرٹری پٹرولیم مومن آغا و دیگر حکام نے وفاقی وزیر کا استقبال کیا۔ وزارت کا قلم دان سنبھالنے کے بعد وفاقی وزیر نے اجلاس کی صدارت کی۔اجلاس میں وفاقی وزیر علی پرویز ملک کو وزارت کے اداروں اور ذمہ داریوں پر جامع بریفنگ دی گئی۔ حکام نے موجودہ تیل اور گیس کے ذخائر، سپلائی چین، ڈیمانڈ سپلائی پروجیکشن سے وزیر پیٹرولیم کو آگاہ کیا۔
اجلاس میں وزارت کے جاری منصوبوں اور مستقبل کے لائحہ عمل پر تفصیلی تبادلہ خیال کیا گیا۔ اس موقع پر وفاقی وزیر علی پرویز ملک نے سحر و افطار میں گیس کی فراہمی کویقینی بنانے کے لیے سخت ہدایات جاری کرتے ہوئے کہا کہ پٹرولیم شعبے کو درپیش چیلنجز سے نمٹنا اولین ترجیح ہے، توانائی کا شعبہ شہہ رگ کی حیثیت رکھتا ہے، عوام پر بوجھ کم کرنے کے لیے تمام وسائل بروئے کار لائیں گے۔ وفاقی وزیر کا کہنا تھا کہ پٹرولیم و منرل سیکٹر میں بیرونی سرمایہ کاری ملک کے لیے خوش آئند ہے، تیل وگیس کی مقامی پیداوار میں اضافے سے عوام کو ریلیف ملے گا۔
Short Link: https://urdu.app.com.pk/urdu/?p=570949
