اسلام آباد/ مریدکے۔22مئی (اے پی پی):وفاقی وزیر برائے تعلیم و پیشہ ورانہ تربیت رانا تنویر حسین نے نیشنل سکلز یونیورسٹی اِسلام آباد مریدکے کیمپس کی سنگ بنیاد کی تقریب میں ہنر مندی کی تعلیم کو وقت کی اہم ضرورت قراد دیا۔
وزارت کی جانب سے جاری بیان کے مطابق اس تقریب میں طلباء،اساتذہ اور اس علاقے کی معززین کی ایک کثیر تعداد نے شرکت کی۔ڈائریکٹر جنرل پاکستان انسٹیٹیوٹ آف ایجوکیشن ڈاکٹر محمد شاہد سرویا کے علاوہ ہائر ایجوکیشن کمیشن آف پاکستان سے غفور احمد، نیوٹیک کی ڈائریکٹر جنرل آصفہ مقبول، محمد شاہد اقبال، جوائنٹ سیکرٹری فیڈرل ایجوکیشن اینڈ پروفیشنل ٹریننگ، انجینئر رانا احمد عتیق انور، اور کئی دیگر معزز شخصیات اس تقریب میں شامل تھیں۔
وائس چانسلر پروفیسر ڈاکٹر محمد مختار نے اس موقع پر حاضرین کو مریدکے کیمپس کی ترقی کے بارے میں بریفنگ دی جو کہ ریکارڈ مدت میں قائم ہوا تھا۔ مریدکے کیمپس کا مقصد مختلف مہارتوں پر مبنی شعبوں میں مفت تربیتی پروگرام فراہم کرنا ہے ۔ حال ہی میں میں سولر پی وی سسٹم ٹیکنیشن، موبائل فون ریپیئرنگ، انڈسٹریل الیکٹریشن، فیشن ڈیزائن اور ڈریس میکنگ اور بیوٹیشن کورسز شروع ہو چکے ہیں۔ وائس چانسلر نے دور حاضر کی تیزی سے ترقی کرتی ہوئی دنیا میں ہنر کی تعلیم کی اہمیت پر زور دیا، ملک کی معیشت کو چلانے میں پیشہ ورانہ تربیت کی اہمیت کو اجاگر کیا۔
تقریب کے دوران، وائس چانسلر نے مریدکے کیمپس کے قیام میں این ایس یو کے ڈپٹی رجسٹرار محمود الحسن اور کیمپس کوآرڈینیٹر ڈاکٹر بلاول رحمٰن کی خدمات کو سراہا۔ ان کی لگن اور کوششوں نے اس کیمپس کو حقیقت بنانے میں اہم کردار ادا کیا ہے۔ وفاقی وزیر برائے تعلیم و پیشہ ورانہ تربیت رانا تنویر حسین نے فنی تعلیم کی اہمیت پر زور دیا اور پاکستان کے عوام کی خدمت کے عزم کا اظہار کیا۔
پیشہ ورانہ تربیت کی معاشی اہمیت کو تسلیم کرتے ہوئے، انہوں نے اس بات پر روشنی ڈالی کہ کس طرح پاکستانی اور بین الاقوامی کمپنیاں ہنر مند افراد کی تلاش میں ہیں۔ وزیر نے ملکی معیشت کو تقویت دینے میں ہنر کی تعلیم کے کردار پر زور دیا، اس بات کو یقینی بناتے ہوئے کہ مریدکے کے لوگوں کو اپنے منتخب شعبوں میں بہترین کارکردگی کا مظاہرہ کرنے اور ترقی کرنے کا موقع ملے۔
اس پرمسرت موقع پر پرو چانسلر این ایس یو نے وائس چانسلر پروفیسر ڈاکٹر محمد مختار کی تعلیم اور ہنر کی ترقی کے میدان میں انتھک خدمات کو سراہا۔ مریدکے کیمپس کے قیام اور ترقی میں پروفیسر مختار کی لگن اور وژن نے اہم کردار ادا کیا ہے۔ نیشنل سکلز یونیورسٹی اسلام آباد کا مریدکے کیمپس پاکستان کی بہتری کے لیے ہنر کی تعلیم کو فروغ دینے میں حکومت کے عزم کا ثبوت ہے۔مریدکے اور آس پاس کے علاقوں کے طلباء کے لیے یہ ایک موقع ہے کہ وہ قابل قدر تجربہ حاصل کریں اور مسابقتی جاب مارکیٹ میں اپنی ملازمت کو بڑھا سکیں۔
