اسلام آباد۔21مارچ (اے پی پی):وفاقی وزیر توانائی سردار اویس احمد خان لغاری سے کنٹری ڈائریکٹر ورلڈ بینک ناجی بینہسین، ورلڈ بینک گروپ کے ماہرین اور آئی ایف سی کے کنٹری منیجر ذیشان شیخ نے ملاقات کی۔ ملاقات میں مٹیاری-مورو-رحیم یار خان ٹرانسمیشن لائن منصوبے کی ابتدائی فزیبلٹی پر تبادلہ خیال کیا گیا۔
ترجمان پاور ڈویژن کی جانب سے جاری اعلامیہ کے مطابق وفاقی وزیر نے واضح کیا کہ کسی بھی خریداری ماڈل کے تحت نیشنل ٹرانسمیشن اینڈ ڈسپیچ کمپنی (این ٹی ڈی سی) کو ترسیلی نظام اور آپریشنز پر کنٹرول برقرار رکھنا ہوگا جبکہ ٹیرف کا تعین نیپرا کے اصولوں کے مطابق کیا جائے گا تاکہ منصوبے کی پائیداری یقینی بنائی جا سکے۔
وفاقی وزیر نے اس بات پر بھی زور دیا کہ اگرچہ اس منصوبے کے بے شمار فوائد ہیں تاہم منصوبے کی کامیابی کا انحصار رائٹ آف وے کے مسئلے کے مؤثر حل پر ہے، جب تک اس چیلنج کو حل نہیں کیا جاتا منصوبے پر مؤثر عملدرآمد ممکن نہیں ہوگا، یہ منصوبہ پاکستان کے توانائی کے بنیادی ڈھانچے کا ایک کلیدی جزو ہے جو قومی ٹرانسمیشن نیٹ ورک کے استحکام اور کارکردگی کو بہتر بنانے کے لئے ڈیزائن کیا گیا ہے،
اس کا مقصد وولٹیج کے استحکام میں بہتری، شمال سے جنوب تک بجلی کی مؤثر ترسیل اور قابل تجدید توانائی کے بڑے ذرائع کے مؤثر انضمام کو یقینی بنانا ہے۔ ملاقات میں وزیرِ مملکت عبدالرحمن کانجو بھی موجود تھے۔
Short Link: https://urdu.app.com.pk/urdu/?p=575157
